Projekti i ri për tregun e kapitaleve dhe sigurimeve-AMF asistohet nga Banka Botërore

Drejtori i Përgjithshëm Ekzekutiv i Autoritetit të Mbikëqyrjes Financiare,  Ervin Koçi priti në një takim përfaqësues të Bankës Botërore për të diskutuar në lidhje me një projekt të ri asistence për zhvillimin e tregjeve dhe mbikëqyrjen efektive të tyre.

“Përfundimi me sukses i projektit “Forcimi i kapaciteteve mbikëqyrëse të Autoritetit të Mbikëqyrjes Financiare: Fokusi tek zhvillimi i tregut të kapitaleve”, me financimin e Sekretariatit Zviceran për Çështje Ekonomike (SECO) në mars 2019 i hapi rrugën bashkëpunimeve të tjera. Koçi falenderoi përfaqësuesit e Bankës Botërore për mbështetjen e vazhdueshme në drejtim të Autoritetit në kuadër të kualifikimit profesional dhe zhvillimit të kapaciteteve mbikëqyrëse. Ai u shpreh se falë mbështetjes së ekspertëve më të mirë ndërkombëtarë të fushës janë hartuar disa projektligje të rëndësishme dhe janë rritur më tej kapacitetet e stafit të Autoritetit” njofton AMF.

Drejtori i Përgjithshëm Ekzekutiv e vlerësoi si shumë të rëndësishëm projektin e ri që pritet të nisë me mbështetjen e Bankës Botërore, në kuadër të zbatimit të strategjisë 5-vjeçare për “Zhvillimin e AMF-së dhe tregjeve nën mbikëqyrje”.

Projekti do të shtrihet jo vetëm në tregun e kapitaleve, por edhe atë të sigurimeve.

Përfaqësuesit e Bankës Botërore u shprehën shumë të kënaqur për bashkëpunimin e deritanishëm me Autoritetit dhe theksuan gadishmërinë e tyre për projektin e ri të asistencës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.