Projekti i Unazës së Madhe, Bardhi: 40 milionë euro pjesë e aferës korruptive, kundërshton ARRSH

Projekti 40 milionë euro i Unazës së Re është i paligjshëm pasi qeveria ka anashkaluar procedurat kyçe të realizimit të një projekti madhor publik, siç përcaktohet në vendim të Këshillit të Ministrave, të 15 korrikut 2015.

Kjo është deklarata e radhës që vjen nga selia blu e cila vijon akuzat për projektin e Unazës së madhe.

Ndërkohë që disa nga banorët të cilët preken nga ndërtimi i Unazës janë strehuar tek banesat sociale, pjesa tjetër e tyre vijon që të protestojë duke kërkuar shpronësimet sipas ligjit dhe vlerës së tregut.

Autoriteti Rrugor Shqiptar ka reaguar menjëherë pas deklaratës që ka bërë deputeti i Partisë Demokratike ku shpjegon se: “Nëse z.Bardhi do kishte ndjekur komunikimet e mëparshme publike të Autoritetit Rrugor Shqiptar do kishte patur rastin të njihet me faktin se e gjithë procedura e ndjekur për rehabilitimin e segmentit “Pallati me Shigjeta-Sheshi Shqiponja” është në përputhje me të gjitha përcaktimet ligjore dhe ka marrë të gjitha lejet përkatëse.

Autoriteti Rrugor Shqiptar ka përmbushur të gjitha detyrimet e përcaktuara në ligj. Siç parashikohet qartësisht në dokumente, e gjithë procedura dhe administrimi i projektit nga studio në fjalë është në përputhje me përcaktimet ligjore.

Fondi i shpronësimit nuk parashikohet në projekt-preventivin e objektit por del pas kryerjes së vlerësimeve përmes një VKM-je të veçantë. Punimet civile janë të matshme dhe certifikohen gjatë e në përfundim të tyre nga inxhinieri (supervizori).

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.