Projekti-TIKKU, shtëpia që zë hapësirën e një parkingu e që ndërtohet brenda natës!
Mjafton hapësira e një parkimi për të ndërtuar TIKKU-n, godinën që ka madhësinë e një automjeti të zakonshëm. Struktura realizohet brenda një nate dhe është perfekte për ambientet urbane ku hapësirat janë të kufizuara. TIKKU është një ndërtesë me mikro apartamente që kanë dimensionet e një parkimi standard prej 2.4x 5 metra. Përbëhet nga disa pjesë që mundësojnë instalimin kudo në botë dhe në pak kohë.
“Aty ku shkon makina mund të rritet TIKKU “, shkruhet në faqen e një studioje arkitekturore finlandeze “Casagrande Laboratory” që ka projektuar këtë shtëpi të parafabrikuar e të vetëmjaftueshme. TIKKU mund të shërbejë si dhomë, serë, zyrë, dyqan etj.
Prototipi i parë është prezantuar në “Helsinki Design Week 2017”dhe modeli i parë ka në përbërje një dhomë gjumi, studio dhe serë. Përbërja e lëndës së tij është prej një materiali 5 herë më të lehtë se betoni ndaj edhe nuk ka nevojë për themele pasi në fund të saj ka një përbërje rëre që ekuilibron ndërtesën. Po ashtu, nuk ka nevojë as për izolime shtesë e nga ana tjetër është edhe i vetëmjaftueshëm për nevojat për faktin se ka panele diellore që prodhojnë energji.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.