Projektligji/ Çfarë do të ndodhë me punonjësit e ALUIZNI-t dhe Hipotekave pas shkrirjes në Agjencinë Shtetërore të Kadastrës
Tashmë në Kuvend është depozituar nisma që parashikon bashkimin në një institucion të vetëm të agjencive e drejtorive që trajtojnë çështjen e pronësisë në vend.
Referuar projektligjit, Agjencia Shtetërore e Kadastrës (në vijim ASHK) është person juridik publik në varësi të Kryeministrit dhe funksionon si institucion me vetëfinancim. Burimet e financimit janë të ardhurat e krijuara nga vetë Agjencia; Buxheti i shtetit, në mbështetje të politikave të Këshillit të Ministrave dhe donacionet dhe kreditë.
Agjencia Shtetërore e Kadastrës organizohet në nivel qendror nëpërmjet Drejtorisë e Përgjithshme në Tiranë dhe në nivel vendor në drejtori e zyra, si struktura varësie. Organizimi i brendshëm, struktura dhe organika, si dhe numri i strukturave të varësisë miratohen nga Kryeministri me propozim të këshillit drejtues. Organet drejtuese të Agjencisë Shtetërore të Kadastrës janë këshilli drejtues dhe drejtori i Përgjithshëm, i cili është njëkohësisht edhe anëtar i këshillit drejtues.
Këshilli drejtues ka gjithsej 7 anëtarë, një prej të cilëve është drejtori i Përgjithshëm. Anëtarët e tjerë të këshillit drejtues nuk janë funksionarë me kohë të plotë dhe zgjidhen përkatësisht si përfaqësues nga:
-Ministria e Drejtësisë;
-Ministria e Financave;
-Ministria përgjegjëse për bujqësinë;
-Ministria përgjegjëse për zhvillimin urban;
-Kabineti i Kryeministrit;
-Autoriteti shtetëror përgjegjës për informacionin gjeohapësinor.
Drejtori i Përgjithshëm emërohet dhe shkarkohet nga Kryeministri.
Ligji parashikon edhe një dispozitë kalimtare ku përcaktohet se drejtuesit e institucioneve aktuale që ristrukturohen në funksion të zbatimit të këtij ligji, me urdhër të përbashkët, krijojnë komisione për realizimin e procesit të ristrukturimit sipas kushteve të këtij ligji.
“Ky proces udhëhiqet nga Bordi Drejtues i Zyrës së Regjistrimit të Pasurive të Paluajtshme nën mbikëqyrjen e ministrit të Drejtësisë dhe Zyrës së Kryeministrit. Arkivi, mjetet e punës, logjistika, baza materiale, sistemet elektronike dhe digjitale të institucioneve aktuale që përfshihen në ristrukturim, krijuar dhe administruar sipas ligjit, i transferohen në përgjegjësi administrimi Agjencisë Shtetërore të Kadastrës. Fondet buxhetore, të planifikuara për ALUIZNI-n dhe AITPP-në, pas hyrjes në fuqi të këtij ligji dhe fondet e ZRPP-së përdoren nga Agjencia Shtetërore të Kadastrës” shkruhet në projektligj.
Përjashtimisht për vitin 2019, të ardhurat e krijuara nga ALUIZNI derdhen në buxhetin e shtetit, përveç të ardhurave që transferohen për llogari të fondit financiar të kompensimit të pronave sipas përcaktimeve të ligjit nr.133/2015, “Për trajtimin e pronës dhe përfundimin e procesit të kompensimit të pronave”, të ndryshuar.
Me hyrjen në fuqi të këtij ligji, të gjithë punonjësit e Zyrës së Regjistrimit të Pasurisë së Paluajtshme, Agjencisë së Legalizimit, Urbanizimit dhe Integrimit të Objekteve/Ndërtimeve Informale, konsiderohen punonjës të Agjencisë Shtetërore të Kadastrës për një periudhë kalimtare 6-mujore nga hyrja në fuqi e këtij ligji, nëse nuk preken nga ristrukturimi dhe plotësojnë kriteret e kualifikimit sipas rregulloreve të miratuara nga këshilli drejtues i ASHK-së. Përjashtimisht për punonjësit e Agjencisë së Inventarizimit të Pronave të Paluajtshme Publike ndiqen procedurat e parashikuara në ligjin nr.152/2013, “Për nëpunësin civil”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.