Projektligji në Kuvend: Pension të parakohshëm për ish të përndjekurit që kanë punuar gjatë vuajtjes së dënimit!
Ish-të dënuarit politikë që kanë punuar në miniera, në nëntokë, gjatë kohës së vuajtjes së dënimit politik, do të çlirohen nga detyrimi për ta provuar këtë me anë të vërtetimit. Projektligji i miratuar nga qeveria dhe i depozituar tashmë në Kuvend, parashikon njohjen e kohës së vuajtjes së dënimit politik në burgjet ku punohej në miniera, në nëntokë si punë e kryer në miniera, në nëntokë.
Nëpërmjet këtij projektligji parashikohet që koha e vuajtjes së dënimit të ish-të dënuarve politikë në burgjet ku punohej në miniera, në nëntokë, të njihet për efekt pensioni si punë e kryer në miniera, në nëntokë. Periudha njihet sa dyfishi i periudhës së qëndrimit në këto burgje. Paga llogaritet sa paga e punës në minierë.
Vërtetimi për kohën e vuajtjes së dënimit në burgjet ku punohej në miniera, në nëntokë do të lëshohet nga Ministria e Brendshme në bashkëpunim me Ministrinë e Drejtësisë.
Projektligji parashikohet të ketë efekte financiare për buxhetin e shtetit, pasi 264 ish-të dënuar politikë në burgjet ku punohej në miniera, në nëntokë do të përfitojnë para kohe pensionin si rrjedhojë e njohjes për efekt pensioni të kohës së vuajtjes së dënimit si punë e kryer në miniera, në nëntokë.
Efektet financiare të projektligjit përllogariten përafërsisht në vlerën 4 milionë lekë për një muaj dhe do të mbulohen nga buxheti i Institutit të Sigurimeve Shoqërore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.