Projektligji për trajtimin financiar të veçantë, pagesë mujore për ish-punonjësit e industrisë ushtarake në Mjekës, Poliçan e Gramsh
Ish punonjësit e industrisë ushtarake në vend do të përfitojnë trajtim të veçantë financiar. Kjo është ajo që parashikohet në vendimin që pritet të miratohet nga qeveria. Në listën e akteve që do të depozitohen në Këshillin e Ministrave nga ministria e Mbrojtjes, është parashikuar edhe amendimi i ligjit “për një trajtim të veçantë të punonjësve që kanë punuar në disa ndërmarrje të industrisë ushtarake”, raporton SCAN.
Miratimi i këtyre ndryshimeve vjen si kërkesë e grupeve të interesit e parashikon futjen në skemën e trajtimit të veçantë, pra marrjen e një pagese mujore, të ish-punonjësve të Kombinatit Mekanik të Poliçanit, Uzinës së Lëndëve Plasëse në Mjekës dhe Uzinës Mekanike Gramsh.
Kombinati i Poliçanit, Uzina Mekanike Gramsh e Uzina e Mjekësit u krijuan në vitin 1962. Kombinati i Poliçanit kishte linjën e prodhimit të municioneve, Uzina Mekanike e Gramshit linjën e prodhimit të armëve ndërsa Uzina e Mjekësit, linjën e prodhimit të eksplozivëve.
Në këto ndërmarrje, vitet e fundit është kryer procesi i demontimit të municioneve të periudhës së regjimit komunist.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.