Prokurimet, raporti i auditimeve – KLSH: Me shkelje 94% e tenderave të kryera nga njësitë vendore
Kontrolli i Lartë i Shtetit ka konstatuar shkelje në 94% të tenderave të kryera nga 42 njësi vendore. TV Scan disponon analizën e auditimeve të kryera nga KLSH në Bashkitë në gjithë vendin. Nga 994 procedura prokurimi të kryera nga këto njësi me vlerë rreth 100 milionë euro, janë audituar 716 procedura, ose 70% e totalit. Sipas Kontrollit të Lartë të Shtetit, janë konstatuar shkelje proceduriale në 672 procedura prokurimi ose në 94% të tenderave të audituara.
Pjesa më e madhe e shkeljeve janë konstatuar në fazën e përgatitjes së dokumenteve të tenderit, në mos argumentimin e vlerës së fondit limit në 88 procedura prokurimi, në mos përcaktimin e dokumenteve të tenderave në 55 procedura prokurimi, në mos përcaktimin e drejtë dhe qartë të specifikimeve teknike në 147 procedura prokurimi.
Në fazën e zhvillimit të procedurave të prokurimeve shkeljet e konstatuara lidhen me standarde të dyfishta në shqyrtimin e ofertave në 200 procedura prokurimi, dhe kualifikimin i padrejtë i operatorëve ekonomikë në 148 procedura prokurimi.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.