Prokurimi publik, qeveria ndryshon rregullat – Shtohen në listën elektronike edhe dy kategori të përjashtuara deri më tani

Këshilli i Ministrave vendosi të ndryshojë disa rregulla në mënyrën e kryerjes së procedurave të prokurimit publik. Për të krijuar më tepër transparencë, qeveria vendosi të shfuqizojë shkronjat a dhe c të nenit 2, i cili flet për procedurat që përjashtohen nga prokurimi në mënyrë elektronike.

Sipas vendimit që mbante datën 29 Dhjetor 2014, deri më sot përjashtoheshin nga pasqyrimi në portalin e Prokurimeve Publike dy kategori procedurash prokurimi: “negocim pa shpallje paraprake të njoftimit të kontratës”, ato me vlerë të vogël nën 100 mijë lekë, si edhe ato me vlerë të vogël që zhvillohen në raste emergjente.

Tashmë, pas botimit në fletoren zyrtare, këto lloje procedurash do të jenë të detyruara të zhvillohen në mënyrë elektronike, çka garanton për një transparencë më të lartë dhe mundësi monitorimi të shpenzimeve të institucioneve shtetërore.

Ndërkohë, sipas vendimit në fuqi, do të vazhdojnë të jenë të përjashtuara nga zhvillimi me mjete elektronike procedurat e prokurimit që kanë objekt blerjen e energjisë elektrike, si edhe faza e dytë e procedurave për shërbim konsulence dhe konkurs projektimi.

Vendimi vjen vetëm pak ditë pasi Ministria e Financave dhe Ekonomisë udhëzoi autoritetet kontraktore, pra institucionet, të mos shpallin më procedura prokurimi për drekat dhe darkat festive, për shkak se nuk konsiderohen mirëpërdorim i fondeve publike.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.