Pronarët, bllokohet procesi në ATP, Agjencia e Pronave: Kadastra na kërkon para’ për dokumentet, nuk trajtojmë dot dosjet
Një ngërç i krijuar mes Agjencisë së Trajtimit të Pronave dhe Agjencisë Shtetërore të Kadastrës ka sjellë bllokimin e procedimit të dosjeve të pronarëve. Shkak janë bërë ndryshimet e ndodhura pas krijimit të Agjencisë Shtetërore të Kadastrës, gjë që solli edhe unifikimin e institucioneve të pronave.
Në raportin për periudhën janar-prill 2020, Agjencia e Trajtimit të Pronave vëren se prej kadastrës është ndryshuar shërbimi i verifikimit të gjendjes juridike të pasurive që shpërblehen financiarisht. Tashmë ASHK, prej shkurtit 2020, kërkon që ky verifikim të bëhet online dhe të paguhet.
Deri tani për këtë shërbim nuk është paguar. Kjo, sipas Agjencisë së Trajtimit të Pronave, ka sjellë bllokim të përkohshëm të procesit. Së pari sipas legjislacionit në fuqi, Agjencia e Trajtimit të Pronave nuk paguan asnjë tarifë për shërbime të marra nga institucione shtetërore, dhe së dyti pasi, një zë i tillë as që është parashikuar në buxhetin e saj.
“Jo vetëm që teknikisht ATP nuk mund të aplikojë online si biznes privat, por edhe nuk mund të paguajë tarifa. Neni 36 i ligjit 133/2015 përcakton se ATP nuk paguan tarifa dhe taksa për bashkëpunimin institucional. Gjithashtu, ATP nuk ka të parashikuar asnjë buxhet për këtë shërbim. Nga ana e ATP janë bërë përpjekje zyrtarisht për zhbllokimin e kësaj situate, që ka sjellë edhe një numër më të ulët të aplikimeve nga subjektet si dhe të rasteve të trajtuara”, thekson Agjencia e Trajtimit të Pronave në raportimin për 4 muajt e parë të vitit.
Në raport theksohet gjithashtu se gjate muajve Mars dhe Prill vërehet renie e subjekteve te reja per aplikim prej infeksionit Covid -19.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.