Pronarët realë të industrisë nxjerrëse – 2 drafte në diskutim, kërkesa: Të miratohen sa më shpejt
Sekretariati i Nismës për Transparencë në Industrinë Nxjerrëse kërkon përshpejtimin e miratimit të draftit ligjor të propozuar prej tij në lidhje me zbulimin e pronarëve realë të kompanive që kryejnë aktivitet në fushën e nxjerrjes së naftës, mineraleve dhe hidroenergjetikës.
Në bazë të detyrimeve që shteti shqiptar ka në kuadër të standardit EITI duhet që deri në fillim të vitit që vjen të jetë bërë publikimi i parë mbi pronarët realë, por vonesat në miratimin e ligjit vështirësojnë këtë proces.
Për këtë arsye, një alternativë që sipas EITI Shqipëri është përfshirja e sugjerimeve në draftin që po harton Ministria e Financave dhe Ekonomisë në drejtim të identifikimit të emrave të pronarëve të kompanive të regjistruara në parajsat fiskale.
Projektligji i Nismës për Transparencë në Industrinë Nxjerrëse është hartuar pas një analize të legjislacionit aktual, ndërkohë që ngjashëm me draftin e propozuar nga ministria ai përcakton që një pronar përfitues duhet të konsiderohet individi që zotëron ose kontrollon më shumë se 25% të aksioneve të shoqërisë.
Ndërkohë që, së rastin e shoqërive të cilat nuk kryejnë aktivitete ekonomike, por veprojnë si ndërmjetës, pragu i zbatueshëm do të ulet në 10%. Gjithashtu, projektligji i propozuar nga EITI saktëson edhe të dhënat do të plotësohen përmes një formulari të standardizuar, ndërkohë që ato duhet të jenë të aksesueshme për çdo person të interesuar përmes krijimit të regjistrit, që do të administrohet nga Ministria e Infrastrukturës dhe Energjisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.