Pronat e ish-piramidave në ankand – Shiten 2 milionë USD pasuri të Vefas, Kamberit e Benos
14 prona të ish firmave piramidale me vlerë prej rreth 2 milionë dollarësh do të nxirren në ankand nga Ministria e Financave. Bëhet fjalë për prona të firmave Vefa, Kamberi dhe Beno. Ankandi do të zhvillohet më 13 shtator të këtij viti nga Drejtoria e Drejtimit të Pronës Publike pranë Ministrisë së Financave.
9 prej pronave që do të nxirren në ankand I përkasin firmës Vefa. Në to përfshihet 4 objekte të “Ish Sektori i Përpunimit te drurit” në Elbasan, tokë truall e “Ish Fabrikës së Salcës” në Fier, “Frigoriferi” në Rrëshen, “Ish Fabrika e Sallamit dhe Magazine Prodhimi” në Përmet, si edhe “Truall Depo Uji Nr. 1” dhe “Truall Stacion Pompimi” në Paskuqan.
Ankandi do vazhdojë me pronat e Firmës Kamberi, ku më të rëndësishmet janë “Ish Pularia” në Patos dhe një Linjë Prodhimi Sallami në nartë të Vlorës. Një pronë i përket Firmës Beno. Bëhet fjalë për një punishte sallami në Lushnje me vlerë rreth 80 mijë dollarë. Prona më e shtrenjtë mes 14 objekteve i përket firmës Kamberi. Ajo është ish pularia e Patosit, me vlerë rreth 100 mijë dollarë.
Pasuritë në fjalë, janë të paktat që kanë mbetur pas konfiskimit të pronave të ish-firmave piramidale dhe ndarjes së një pjese prej tyre.
Skemat piramidale në Shqipëri filluan aktivitetin e tyre në vitin 1991, duke sjellë si pasojë vitin tragjik, 1997, me falimentimin e rreth 25 firmave të cilat grumbulluan rreth 1.2 miliardë dollarë kursime të shqiptarëve.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.