Pronat e sekuestruara, banesa sociale – Vendimi: Agjencia e Administrimit të Pasurive e të Konfiskuara do ua kalojë bashkive
Pronat e sekuestruara apo të konfiskuara do i kalohen Bashkive të cilat do të mund t’i përdorin për programet e strehimit social. Përmes një vendimi të miratuar më 11 nëntor dhe të botuar së fundmi në Fletoren Zyrtare, Këshilli i Ministrave ka përcaktuar rastet kur njësitë e qeverisjes vendore do bashkëpunojnë me ato qendroret për krijimin apo shtimin e fondit të banesave sociale.
Vendimi përcakton se njësitë e vetëqeverisjes vendore i kërkojnë mbështetje administrative Ministrisë së Brendshme, në rast të kalimit të pronësisë ose të administrimit mbi pronat e konfiskuara, si pasuri të vëna me aktivitet të paligjshëm. Njësia e vetëqeverisjes vendore, pasi ka verifikuar mundësinë e përdorimit për strehim social të objektit të konfiskuar, i drejtohet me kërkesë me shkrim Ministrisë së Brendshme; Agjencia e Administrimit të Pasurive të Sekuestruara e të Konfiskuara përgjigjet për përgatitjen e dokumentacionit përkatës, bazuar në kërkesën e njësisë së vetëqeverisjes vendore dhe për paraqitjen e këtij dokumentacioni pranë Komitetit Ndërinstitucional për Masat Kundër Krimit të Organizuar;
Më tej, pasi merret miratimi nga Komiteti Ndërinstitucional për Masat Kundër Krimit të Organizuar, Ministria e Brendshme, në bashkëpunim me ministrinë përgjegjëse për strehimin, i propozojnë Këshillit të Ministrave kalimin e objektit në pronësi të njësisë së vetëqeverisjes vendore përkatëse;
Në rastet kur prona destinohet të bëhet pjesë e fondit publik të banesave sociale me qira, por mbetet në pronësi të pushtetit qendror, objekti kalon në administrim të Agjencisë së Administrimit të Pasurive të Sekuestruara e të Konfiskuara. Mbështetja financiare i akordohet Entit Kombëtar të Banesave për krijimin ose shtimin e fondit publik të banesave sociale në pronësi të pushtetit qendror, kur ky i fundit aplikon për mbështetje financiare nëpërmjet ndërtimit ose përshtatjes së objekteve ekzistuese, sipas studimit të fizibilitetit të hartuar nga Enti Kombëtar i Banesave dhe kur ka nënshkruar një marrëveshje bashkëpunimi me njësinë e vetëqeverisjes vendore.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.