Pronat në bregdet – Hahn: Të vetëdijshëm për shqetësimet e pronarëve
Komisioni Europian shprehet i shqetësuar për problemet me pronësinë e tokës në Shqipëri. Komisionieri Johannes Hahn, tha në një intervistë për Deutsche Welle, tha se Komisioni është i vetëdijshëm për shqetësimet që janë krijuar nga ndryshimet ligjore të viteve të fundit, që i japin shtetit të drejtën për shpronësuar tokën edhe në shërbim të projekteve private për investime strategjike.
“Komisioni Europian është i vetëdijshëm për shqetësimet ndaj vendimeve të fundit, të miratuara nga Qeveria shqiptare, lidhur me menaxhimin e tokës përgjatë zonës jugore bregdetare dhe vazhdon të angazhohet me autoritetet kompetente në këtë drejtim. Duke pasur parasysh rëndësinë e temës në vend, është vendimtare që çdo masë e mëtejshme të jetë pjesë e një procesi të hapur dhe gjithëpërfshirës dhe të përshtatet në një plan të strukturuar reformash.”
Nga ana tjetër, Hahn theksoi se problemet e pronësisë nuk janë vetëm një çështje e të drejtave të njeriut, por edhe për zhvillimin ekonomik. Sipas tij, pasiguria mbi të drejtat e pronësisë frenon investimet e huaja dhe nxit informalitetin.
“Çështjet e pazgjidhura në këtë fushë kanë një efekt negativ në të drejtën e individit ndaj pronës dhe në gëzimin paqësor të saj, duke përfshirë edhe privimin e mundshëm të pronarëve legjitimë nga prona, toka e tyre. Për më tepër, ato mund të kontribuojnë në një “efekt ngrirës” mbi investimet e aktorëve të biznesit dhe të krijojnë një premisë për informalitetin, duke përdorur vakumet në zbatimin e ligjit. Në këtë drejtim, Komisioni Evropian pohon se konsolidimi i të drejtave pronësore kërkon të drejta të pronës të qëndrueshme, që të funksionojnë mirë në të gjithë vendin, në të cilat të jetë përmbushur parimi i sigurisë ligjore.”
Hahn tha se kuadri i të drejtave pronësore në Shqipëri mbetet i fragmentarizuar dhe kërkon përpjekje për të adresuar dobësitë e ligjore dhe teknike. Ai shtoi se mënyrat e një ndërhyrjeje të tillë ende mbeten për t’u përcaktuar, por drejtimi i aktorëve ndërkombëtarë dhe ekspertëve po përdoren për të mbështetur reformat në këtë fushë komplekse.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.