Pronësia industriale – Projektligji kalon në komision, të enjten votohet në seancë plenare

Komisioni për Veprimtarinë Prodhuese, Tregëtinë dhe Mjedisin miratoi ndryshimet në projektligjin “Për pronësinë industriale”.

Projektligji i përgatitur nga Drejtoria e Përgjithshme e Patentave dhe Markave, institucion në varësi të Ministrisë së Zhvillimit Ekonomik, Turizmit, Tregtisë dhe Sipërmarrjes – mori votat e nevojshme në komision dhe pritet të votohet në seancën plenare të ditës së enjte. Kryetari i këtij komisioni, Eduard Shalsi, e cilësoi miratimin e këtij projektligji si çeljen e një kapitulli të ri në fushën e regjistrimit të patentave.

Ndryshimet e propozuara në projektligj kanë të bëjnë më përmirësimin e procedurave të ekzaminimit dhe të mbrojtjes së objekteve të pronësisë industriale, përcaktimin e kritereve për markat e mirënjohura, ndryshimin e formës së organizimit të Drejtorisë së Përgjithshme të Pronësisë Industriale etj.

Projektligji thuhet se është hartuar duke marrë parasysh rekomandimet e ekspertëve vendas dhe të huaj, përfshirë edhe grupet e interesit, përfaqësues të biznesit etj.

Për funksionimin dhe përmbushjen e misionit të saj, DPPI-ja thuhet se do të mbështetet tërësisht në të ardhurat që ajo krijon nga aktiviteti i saj. Të ardhurat që kjo drejtori gjeneron realizojnë një buxhet disa herë më të lartë se buxheti që merr aktualisht.

Në relacionin shpjegues të qeverisë, këto të ardhura pritet të vazhdojnë rritjen në të ardhmen.

Florenc Drizari/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.