Pronësia, jemi në fund të botës – Raporti i 2019, Shqipëria humbet 4 pozicione, gjyqësori na “fundos”

Aleanca për të drejtat e pronësisë ka publikuar “Indeksin global të të drejtave të pronësisë 2019”. Ky indeks është unik në llojin e tij pasi është i vetmi që mat si të drejtat mbi pronën fizike ashtu edhe të drejtat mbi pronën intelektuale. Raporti merr në analizë plot 127 shtete, dhe ndër to, Shqipëria renditet e 106-ta në botë.

Pra, në fund të tabelës, dhe në Europë, vetëm me Bosnje Hercegovinën dhe Ukrainën më keq se ne. Madje, raporti i këtij viti tregon se krahasuar me një vit më parë, Shqipëria ka pësuar një përkeqësim në renditjen e përgjithshme, duke humbur plot 4 pozicione, nga vendi i 102-të i një viti më parë. Indeksi i përgjithshëm përpilohet mbi bazën e 13 nën-indikatorëve, mes të cilëve edhe kontrolli i korrupsionit, apo stabiliteti politik, veç të tjerëve si patentimi, të drejtat mbi autorësinë, regjistrimi i pronës, sundimi i ligjit, etj.

Në nën-indikatorët e sundimit të ligjit dhe politikës, Shqipëria ka pësuar rënie kudo krahasuar me një vit më parë, si dhe renditet ndër performueset më të këqija në rajon. Ndër 13 nën-indikatorë, vendi ynë regjistron performancën më të keqe në atë të pavarësisë së gjyqësorit, ku merr vetëm 2.2 pikë si dhe në atë të piraterisë së të drejtave të autorit. Performanca më e mirë ndërkohë vjen në drejtim të regjistrimit të pronës, ku Shqipëria merr 9.4 pikë, nga 10 të tilla. Në nivel global ndërkohë, Finlanda renditet e para, ndërsa Yemeni në vendin e fundit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.