Propozimet e opozitës, Tabaku dhe Kadia: Ulje taksash, mbështetje ndaj biznesit
Opozita pretendon se ka një program të qartë ekonomik që ul taksat dhe rrit vendet e punës. Të pyetur nga TV SCAN, përfaqësues të Partisë Demokratike thonë se tryezat e fundit që janë zhvilluar me përfaqësues të biznesit të huaj në vend janë reflektuar në planin ekonomik.
Deputetja Jorida Tabaku dhe sekretari për Sipërmarrjen e Lirë në Partinë Demokratike, Besart Kadia, ndalen tek ulja e taksave dhe krijimi i lehtësirave për biznesin.
Të pyetur për propozimin e kryeministrit Edi Rama, 1 miliard euro investime në infrastrukturë, shëndetësi, arsim dhe turizëm në formën e partneritetit publik-privat për tri vitet e ardhshme, deputetja Tabaku e quan propagandë, ndërsa Kadia ngre shqetësimin e rritjes së borxhit.
Prej disa ditësh opozita ka bojkotuar komisionet parlamentare në Kuvendin e Shqipërisë në shenjë proteste ndaj qeverisjes së vendit, por propozimet për planin ekonomik priten të diskutohen në takimet me qytetarët dhe në tryezat me biznesin.
Florenc Drizari/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.