Propozimi i pazakontë e provokues i ekonomistit të “Bundesbank”: “Të krijohen bono solidariteti e italianët të detyrohen t’i blejnë ato”!
“Sa u kërkohet ndihmë partnerëve europianë, qeveria italiane duhet të tërheqë kursimet e mëdha private të qytetarëve të saj për të investuar në tituj shtetërore një pjesë të konsiderueshme të trashëgimisë së tyre”. Kjo është receta që mediat italiane e cilësojnë si “provokuese” e propozuar nga ekonomisti i “Bundesbank” Karsten Wendorff në intervistën dhënë “Frankfurter Allgemeine Zeitung”.
“Në vend të një fondi europian që blen titujt e shtetit italian duhet që të krijohet një fond kombëtar për blerjen e tyre” shkruan ai.
Fondi, sipas ekonomistit që e saktëson se mendimi është personal dhe jo institucional, do të financohej nga “Bonot e solidaritetit kombëtar” që familjet italiane do të ishin të detyruara që t’i blinin në një masë që korrespondon me 20% të pasurisë së tyre neto.
Me këtë ritëm, sipas ekonomistit, thuajse gjysma e borxhit publik mund të konvertohej në bono solidariteti.
Ky propozim vjen në një kohë kur Komisioni Europian ka refuzuan planin e shpenzimeve të Italisë me argumentin se shkel ligjin europian të nivelit të borxhit publik. Ky vendim i paprecedentë ka sjellë reagimin e qeverisë italiane që ka deklaruar se nuk do të tërhiqet nga drafti i saj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.