Propozimi: “Moratorium” për projektligjet me karakter financiar!

Konfindustria vlerëson mjaft shqetësuese miratimin e akteve me fuqinë e ligjit  të projekteve, që kanë ndikim të madh financiar dhe prekin ndjeshëm në afatgjatë ekonominë kombëtare, në kushtet kur Kuvendi i Shqipërisë nuk funksionon normalisht nga këndvështrimi i numrit, profesionalizmit dhe përqëndrimit të tejskashëm në proceset e krizës politike dhe integrimit të vendit në BE.

“Në Kuvendin e Shqipërisë mungon pothuaj 1/7 e numrit të përgjithshëm të deputetëve dhe cilësia e oponencës ndaj akteve ligjore të sjella nga qeveria ka qenë e ulët në komisione parlamentare dhe në seanca plenare. Rëndësia dhe koha e kushtuar akteve ligjore me ndikim ekonomik dhe financiar ka qenë e ulët dhe është shmangur pothuaj krejtësisht pjesëmarrja e grupeve të interesit dhe informimi publikut.

Konfindustria vlerëson, se do të ishte akt përgjegjshmërie në respekt të demokracisë nga shumica politike dhe qeveria, që në kushtet e mësipërme, të jetë e përmbajtur në sjelljen me nxitim dhe miratimin pa ju nënshtruar një oponence të vërtetë profesionale në Kuvendin e Shqipërisë të akteve ligjore, që sjellin pasoja të thella financiare në afatgjatë për ekonominë, biznesin dhe qytetarët shqiptarë.

Në rast të kundërt aktet ligjore të miratuara rrezikojnë seriozisht të jenë të paarsyetuara profesionalisht, subjektive dhe deri të tipit korrupsionist “state capture/kapje e shtetit” me pasoja të rënda në afatgjatë për zhvillimin ekonomik të vendit. Përgjegjësi të drejtpërdrejtë në gjendjen e mësipeme ka edhe pakica politike me largimin e saj nga vendimarrja ligjore”shkruhet në deklaratën e shpërndarë për mediat nga administratori i Konfindustrias, Gjergj Buxhuku.

Më tej, në deklaratë evidentohet se në Kuvendin e Shqipërisë, në legjislaturën në vazhdim brenda muajit shtator 2019 janë miratuar kontrata koncesionare të tipit PPP me vlerë 330 milionë euro, që përbëjnë mbi 3% të PBB.

Gjithashtu,sipas Konfindustrias,  në mënyrë të përshpejtuar janë sjellë projektligje shumë të rëndësishme për biznesin, qytetarët dhe ekonominë e vendit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.