Protesta e opozitës te Parlamenti – Opozita dorëzon dorëheqjet nga mandatet, Basha: Është vetëm fillimi, do rrëzojmë Ramën

Ka zgjatur për rreth dy orë protesta e opozitës përpara godinës së parlamentit. Ndërsa përreth saj ishin vendosur forca të shumta të ruajtjes së rendit, protesta është zhvilluar pa asnjë incident me protestuesit që kanë hedhur vazhdimisht parulla kundër qeverisë.

E vetmja gjë për t’u shënuar ishin disa fishekzjarre e tymuese të hedhura nga protestueset. Ndërsa qytetarët nisën të mblidheshin parpara Parlamentit që herët në mëngjes, tubimi arriti kulmin gjatë mesditës, kur deputetët e përfaqësues të gjithë spektrit opozitar ju adresuan të pranishmëve me fjalime të shkurtra, ku shpjegonin motivin e djegies së mandateve dhe vendosmërinë për të rrëzuar qeverinë. Kreu i Lëvizjes Socialiste për Inegrim Monika Kryemadhi u tha protestuesve se mandatet tashmë nuk qenë më të deputetëve, port ë popullit, dhe se ai tashmë ka rrugën e hapur për rikthimin në vitin 1990.

I fundit ju drejtua protestuesve Lulzim Basha, Kreu i Partisë Demokratike.  Ai tha se ky është vetëm fillimi i betejës për të rrëzuar Qeverinë e Edi Ramës,  i cili, sipas tij,  nuk duhet të lejohet të largohet nga Shqipëria, pasi duhet t’i dorëzohet drejtësisë. Ai ju adresua me një mesazh edhe ndërkombëtare, duke u thënë se shqiptarët kanë të drejtë të kenë vlerat dhe parimet që zotërojnë në vendet e tyre.

Në fund të fjalës, Basha u kërkoi protestuesve t’i bashkoheshin deputetëve të opozitës për tek Kryesia e Kuvendit, ku edhe u bë dorëzimi i mandateve. Pas dorëzimit të dorëheqjeve në kryesinë e Kuvendit, ku vetëm pak minuta më parë kishte qenë Kryeministri Edi Rama, Basha dhe deputetët e tjerë u largua në drejtim të selisë së Partisë Demokratike.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.