Protesta kundër regjimit në Iran/ Liderët botërorë fajësojnë vendin për goditjen e avionit civil

Irani pranoi se ka qëlluar aksidentalisht avionin ukrainas, pasi e ngatërroi me një predhë,  ç’ka solli reagim ndërkombëtar dhe protesta në rrugët e Teheranit, që morën mbështetjen nga presidenti amerikan, Donald Trump.

“Ne po i ndjekim protestat tuaja nga afër dhe jemi të frymëzuar nga kurajo juaj”, shkroi Trump në twitter në anglisht dhe në gjuhën iraniane.

Edhe kryeministri kanadez, Justin Trudeau tha se është irrituar nga pranimi i Iranit se ka qëlluar avionin e linjës ajrore “Ukranian International”.

Të paktën 57 kanadez ishin ndër 176 personat që mbetën të vdekur. “Ajo që ka pranuar irani është shumë serioze. Goditja me predha e një avioni civil është e llahtarshme. Irani duhet të mbajë përgjegjësi të plotë”, tha Trudeau.

Presidenti ukrainas, Volodymyr Zelenskiy tha se kërkon pranimin e plotë të fajit nga Irani. Ukraina dhe Irani do të bashkëpunojnë në dëshifrimin e kutive të zeza të avionit. Zelenskiy shtoi se qeveria ukrainase do të japë ndihma ndaj familjeve të personave që vdiqën.

“I bëj thirrje të gjithë partnerëve ndërkombëtarë të Ukrainës dhe të gjithë komunitetit botëror që të bashkohet për të ushtruar presion deri sa të zbulohet hetimi i plotë”, tha Zelenskiy.

Për ditë me radhë, autoritetet iraniane e mohuan fajin pavarësisht se Kanadaja dhe Shtetet e Bashkuara deklaruan se inteligjenca e tyre kishte zbuluar se avioni u rrëzua nga një predhë iraniane.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.