Protesta masive kundër masave antiCovid dhe vaksinimit – Reagon politika gjermane
Politika gjermane i ndjek me shqetësim protestat, pjesërisht të dhunshme të zhvilluara në fundjavë në disa qytete gjermane kundër masave antiCovid dhe vaksinimit. Por sa serioz është rreziku i radikalizimit?
Në të gjithë Gjermaninë u zhvilluan në fundjavë protesta kundër masave antiCovid dhe vaksinimit. Jo të gjitha protestat ishin paqësore, e jo të gjitha ishin të lejuara dhe sipas ekspertëve dhe politikës ekziston një radikalizimi.
Studiuesi i terrorizmit, Peter Neumann, i cili i ndjek me shqetësim zhvillimet e protestave kundër masave kufizuese dhe vaksinimit, shikon një rrezik potencial për një radikalizim të tyre. Në një intervistë për Bild TV, Neumann u shpreh se “ajo që shohim në mënyrë të veçuar janë sulme komplekse ndaj Instituti Robert Koche ndaj klinikave apo qendrave të vaksinimit.” Për këtë arsye ai e sheh të mundur, “që në muajt e ardhshëm vërtet ka një rrezik për fushata të mundshme terroriste.” Sipas Neumann temat si detyrimi për vaksinim apo vaksinimi i fëmijëve do të çojnë në një radikalizim të mëtejshëm dhe këto janë dy tema të forta emocionale, që nga kjo skenë do të vlerësohen si sinjal dhe mund të shërbejnë si shkas për veprime ekstreme. Studiuesi Neumann mendon, se ky grupim do të bëhet më i vogël, por ata që mbeten do të radikalizohen edhe më tej.
Reagime të shqetësuara vijnë edhe nga politika dhe janë rritur zërat për një veprim të vendosur të shtetit. Presidentja e Bundestagut, Bärber Bas, konstaton një radikalizim “të ndjeshëm” të protestave. Ajo kërkoi ndalimin e demonstratave para shtëpive të politikanëve si edhe një mbikëqyrje më të fortë të grupeve të chat-it Telegram pasi në këtë rrjet social grumbullohen shumë kundërshtarë të Koronavirusit.
Kurse zëvendëskryetari i grupit parlamentar të Unionit CDU/CSU, Thorsten Frei (CDU) kërkoi ndjekjen penale dhe konsekuente të përpjekjeve për frikësimin e shtetit apo shkeljeve të ligjit për grumbullimet. Ndërkaq politikani i Të Gjelbërve, Konstantin von Notz e cilësoi “më shumë se kërcënues” zhvillimin aktual duke thënë se grupime të tilla nuk duhet të reduktohen si të padëmshme. Zëvendëskreu i grupit parlamentar liberal, Konstantin Kuhle paralajmëroi nga infiltrimi i qëllimshëm i protestave paqësore. Kryeministrja e landit të Meklenburg-Pomeranisë, Manuela Schwesig u shpreh, se “shumë ndjekin qëllime të tjera veç Coronës, ata përdorin debatin emocional për detyrimin për vaksinim për të përçarë.” DW
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.