Protesta për 1 Majin – Sindikatat në Kosovë kërkojnë rritjen e pagës minimale në 300 euro

Dy nga sindikatat e punëtorëve në Kosovë kanë organizuar një protestë në Prishtinë, përmes së cilës kërkojnë zbatimin e Kontratës Kolektive dhe rritjen e pagës minimale.

Shifra që ato kërkojnë është në masën e 300 eurove, ose 85% më e lartë se paga minimale e propozuar nga qeveria shqiptare së fundmi.

Lista e plotë e kërkesave drejtuar qeverisë dhe pronarëve të kompanive

• Pagë minimale neto 300 euro
• Të paguhet stazhi i punës në sektorin publik dhe privat
• Stazhi i punës për pensione të zbritet në 10 vjet, nga 15 vjet
• Të formohet Gjykata e Punës
• Të zbatohen ligjet e punës dhe Marrëveshja Kolektive
• Të punohet për parandalimin e vdekjeve në vendet e punës

Jusuf Azemi, kryetari i Sindikatës së Pavarur të Sektorit Privat thotë se punëtorët e këtij sektori nuk gëzojnë në punë të drejtat që u garanton ligji dhe se janë të diskriminuar, sidomos në raport me punonjësit e administratës.

“Përderisa punëtorët në sektorin publik , gëzojnë rritje të pagave të herë pas hershëm në sektorin privat që nga viti 2011 nuk ka ndryshime dhe kjo pagë minimale është nga 130 deri në 170 euro. Në sektorin publik dihet orari i punës, dihet pushimi vjetor , dihet pushimi mjekësor , puna jashtë orarit, stazhi i punës. Ndërsa në sektorin prita të gjitha këto mungojnë. A është mëkat ku dy punëtorë me të njëjtat ligje paguhen ndryshe”, tha Azemi.

Ndërkohë, kryetari i Sindikatës së Bashkuar të Arsimit, Shkencës dhe Kulturës, Avni Ajdini tha se edhe në sektorin publik ka probleme, por punonjësit nuk protestojnë, pasi janë të frikësuar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.