Protesta për Rrugën e Kombit – Meta: Qytetarët kanë të drejtë të dinë për çdo taksë që paguajnë
“Qytetarët kanë të drejtën e llogaridhënjes ndaj qeverisë për çdo taksë që paguajnë”. Presidenti Ilir Meta i pyetur vetëm pak ditë pasi protestuesit i vunë flakën kabinave ku bëhej pagesa e tarifës së kalimit në Rrugën e Kombit , shprehet se duhet të ketë më shumë dialogë në emër të mirëqeverisjes.
“Është e domosdoshme që çdo vendim që ka të bëjë me qeverisjen të jetë mirëstudiuar. Është e drejtë e çdo qytetari të forcojë ndjenjën e llogaridhënies ndaj qeverisjes vendore për çdo taksë që paguajnë apo shërbim që duhet tu afrohet.Shpresoj në një reflektim të përgjithshëm dhe në vendosjen e një dialogu i cili ndihmon në përmirësimin e mirëqeverisjes së vendit dhe besimit dhe respektimit tek institucionet e përbashkëta”, u shpreh Presidenti.
Presidenti Meta i pyetur për thirrjet që janë bërë nga opozita për mos pagimin e taksave u shpreh se, vendi ynë mbahet në bazë të kontributit të çdo qytetari.
“Mendoj se ky vend qëndron në bazë të kontributit të çdo qytetari në radhë të parë, por edhe të çdo taksapaguesi. Dhe në këtë drejtim edhe qeveria, por edhe opozita duhet të rrisin bashkëpunimin dhe transparencën në respekt të qytetarëve shqiptarë në radhë të parë, dhe të gjitha kërkesave dhe pretendimeve të tyre, por edhe të taksapaguesve shqiptarë, të cilët mbajnë edhe shtetin, edhe institucionet”, tha Meta.
Presidenti Meta i pyetur pas aktivitetit “Aleanca Kombëtare e Studentëve Senator” iu bëri thirrje edhe forcave politike që të kenë më shumë dialog e bashkëpunim me njëra-tjetrën për të mirën e vendit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.