Protesta për Rrugën e Kombit – Qytetarët bllokojnë lëvizjen e automjeteve

Qytetarët e Qarkut të Kukësit po protestojnë kundër vendosjes së tarifës për Rrugën e Kombit. Protestuesit kanë bllokuar lëvizjen e automjeteve. Ata janë konfrontuar edhe me policinë në disa momente, duke qëlluar me gurë dhe mjete të tjera të forta në drejtim të tyre.

Sipas tyre, tarifa e vendosur prej 5 euro është një tarifë e shtrenjtë. Lidhur me propozimin e përjashtimit të tyre nga tarifa, kryeministri Rama u shpreh gjatë seancës parlamentare të së enjtes se kjo nuk ndodh në asnjë vend të botës. Sipas tij, ata të cilët do të përdorin këtë aks rrugor shpesh, do të pajisen me kartë.

Tarifat për Rrugën e  Kombit, e cila do të fillojë të aplikohet që nga dita e mërkurë, variojnë përkatësisht: 2.5 euro për motorë, 5 euro për makinat e vogla dhe deri në 22.5 euro për kamionët e mëdhenj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.