Protesta të dhunshme në Paris-Manifestime edhe në Spanjë, Turqi dhe Rusi!

Manifestimet me rastin e 1 majit, ditës ndërkombëtare të punëtorëve janë shndërruar në përplasje mes protestuesve dhe policisë në Paris. Sindikatat, jelekët e verdhë, ekologjistët dhe shumë organizata të tjera janë bashkuar për të protestuar kundër politikave ekonomike dhe sociale të presidentit francez, Emmanuel Macron.

Sipas Ministrisë së Brendshme vetëm në Paris kanë protestuar rreth 40 mijë persona, ndërsa në të gjithë qytetet e tjerë kanë dalë në rrugë mbi 150 mijë persona. Sipas “Le Monde”, janë arrestuar rreth 165 persona, ndërsa policia ka përdorur gaz lotsjellës kundër protestuesve.

Protestuesit kanë shprehur pakënaqësi për mënyrën se si politikanët sillen me të varfërit. Në Spanjë, ndërkohë,  sindikatat  shfrytëzuar 1 majin për ti bërë thirrje Partisë Socialiste, e cila me shumë mundësi do të drejtojë vendin, që të rrisë pagat dhe pensionet dhe rregullimin e reformës në tregun e punës të ndërmarrë nga Mariano Rajoy. Sindikatat që protestuan në Madrid i bënë thirrje kryeministri aktual, Pedro Sanchez, që të rregullojë reformat e tregut të punës, që u realizuan nga Partia Konservatore në vitin 2012.

Papunësia në Spanjë u rrit në 27% në vitin 2013 dhe thuajse është përgjysmuar aktualisht. Protesta të dhunshme ka pasur edhe në Stamboll. Policia njoftoi se janë arrestuar 127 persona, në përpjekje për të mbajtur demostrata të paligjshme në pjesë të ndryshme të qytetit, me rastin e 1 majit.

Policia rrethoi sheshin Taksim dhe lejoi vetëm një ceremoni të organizuar nga drejtuesit e unionit të punëtorëve. Në Beshiktash, ndërkohë, një grup protestuesish filluan  të valëvisnin flamuj të Partisë Popullore Çlirimtare.

Pamjet nga vendi i ngjarjes tregojnë se protestuesit u përleshën me policinë. Në Rusi, policia dhe garda kombëtare arrestuan më shumë se 120 persona, duke përdorur madje edhe forcë ekstreme për të shoqëruar aktivistët anti-qeverisë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.