Protestat e linjave interurbane – MTI ndërpret procesin e licencimit, pavarësisht pretendimeve “të pabaza”
Ministria e Transporti dhe Infrastrukturës ka reaguar ndaj protestave të zhvilluara nga disa linja të autobusëve urbanë mbi licencimin e operatorëve të rinj të transportit ndërqytetas.
Shoqata e autobusëve interurbanë pretendon se mbivendosja e linjave po krijon një konkurrencë të pandershme në treg.
Këto pretendime u hodhën poshtë nga MTI si jo të mbështetura në ligj dhe me qëllim spekulativ. Sipas kësaj ministrie, procesi i hartimit të rrjetit dhe rrjedhimisht shtimit të linjave është bërë në bashkëpunim mes MTI-së, shoqatave të transportit ndërqytetas dhe pushtetit vendor, për të plotësuar nevojat e banorëve për mbulim të plotë të territorit.
“Gjatë procesit është marrë mendimi edhe i shoqatës që organizoi protestën, e cila ka shfaqur vlerësimin për nismën dhe bashkëpunimin me Ministrinë. Ministria e Transportit dhe Infrastrukturës, u bën apel të gjithë operatorëve të transportit ndërqytetas, që të operojnë në përputhje me kushtet e liçensave dhe të mos abuzojnë. Sepse janë pikërisht këto abuzime të operatorëve në raste të caktuara, që krijojnë këto pretendime të paqena”, thuhet në njoftim për shtyp të Ministrisë.
Argumenti i ministrisë vijon me faktin se përfaqësuesi i shoqatës që ka ngritur pretendimin është në proces gjyqësor me një palë tjetër për operimin e njërës prej linjave dhe po përpiqet të dizinformojë opinionin publik.
Megjithatë Ministri Sokol Dervishaj ka vendosur pezullimin e procesit të licencimit të linjave ndërqytetase deri në marrjen e detyrës nga titullari i ri. Pra, procesi do të bllokohet deri në emërimin e ministrit të ri, Damian Gjiknuri në krye të Ministrisë që ka ndryshuar strukturë, atë të Energjisë, Transportit dhe Infrastrukturës.
Sipas Ministrisë, kjo ndërprerje, që do të zgjasë së paku deri më datën 10 Shtator, bëhet për të ndalur çdo keqinterpretim dhe spekulim dhe u kërkon ndjesë operatorëve që kanë aplikuar.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.