Protestat mbulojnë Kilin/ Mbi 1 milion persona marshojnë në Santiago

Mbi 1 milionë persona kanë protestuar në Kili gjatë fundjavës, duke formuar një nga kryengritjet më të mëdha që kur shpërtheu dhuna një javë më parë, prej  pabarazisë së rrënjosur në shtetin e Amerikës së Jugut.

Protestuesit që mbanin flamujt kombëtar, kërcenin nëpër rrugë dhe bënin thirrje për ndryshim politik dhe social, kanë marshuar për kilometra nga i gjithë Santiago, duke u mbledhur në Plaza Italia. Trafiku, që ishte penguar nga shoferët e taksive dhe kamionëve që protestonin tarifat e rrugëve, u bllokua plotësisht në Santiago, ndërkohë që turmat bllokuan rrugët kryesore dhe transporti publik u pezullua.

Guvernatorja e Santiago, Karla Rubilar, tha se 1 milionë njerëz kanë marshuar në kryeqytet,  që është thuajse 5% e popullsisë së vendit.  Protesta ka pasur në të gjithë qytetet e mëdha të Kilit.

“Është ditë historike.  Po zhvillohen marshime paqësore prej rreth 1 milionë njerëz që përfaqësojnë ëndrrën e një Kili të ndryshuar”, shkroi ajo në Twitter.

Shumë komentatorë vlerësuan se numri i protestueseve e kalonte lehtë 1 milionshin, duke e përshkruar si marshimin më të madh që kur “vdiq” diktatura e Augusto Pinocheti.

Trazirat në Kili janë të fundit në një valë protestash në Amerikën e Jugut dhe të gjithë Botën, nga Bejruti në Barcelonë, që janë shkaktuar nga faktorë të brendshëm por që ndajnë të njejtin irritim ndaj pabarazive sociale dhe elitës sunduese.

Protestat në Kili nisën prej rritjes së tarifave të transportit publik javën e kaluar dhe morrën vrull duke sjellë kaos nëpër rrugë, ku u vranë të paktën 17 persona, plagosur qindra dhe arrestuar mbi 7,000.   Dëmet te bizneset kaluan shifrën e 1.4 miliardë dollarëve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.