“Provat e AstraZeneca, jo të sakta” / Agjencia në SHBA flet për informacion të vjetër tek prova e vaksinës

Një agjenci e shëndetit në Shtetet e Bashkuara, bëri të ditur se AstraZeneca mund të ketë përfshirë informacion të vjetër në rezultatet e provave të vaksinës, duke ngritur dyshime mbi normën e efektshmërisë së publikuar.  Lajmërimi vjen 1 ditë pasi provat e fazës përfundimtare në SHBA, treguan se vaksina është e sigurtë dhe efektive. Kjo ngre dyshime mbi miratimin e vaksinës së AstraZeneca në SHBA në muajin e ardhshëm, si planifikohej nga kompania.

“Bordi i monitorimit shprehi shqetësime se AstraZeneca mund të ketë përfshirë informacion të vjetër tek prova, që mund të ketë ofruar një rezultat jo të plotë të të dhënave të efikasitetit. I bëjmë thirrje kompanisë të bashkëpunojë për të rishikuar të dhënat”- deklaroi Instituti Kombëtar i Alergjisë dhe Sëmundjeve Infektive, që drejtohet nga këshilluesi i Shtëpisë së Bardhë, Anthony Fauci.

Në nisje të Javës,  rezultatet e provave në SHBA treguan se vaksina e zhvilluar nga AstraZeneca është 79% efektive në parandalimin e sëmundjes simptomatike dhe 100% efektive ndaj shtrimit në spital.  Zbulimet u mirëpritën gjerësisht, duke rritur besimin publik tek vaksina.  Të dhënat nga provat e fazës së fundit u bazuan tek mbi 32,000 vullnetarë, në 88 qendra klinike në SHBA, Peru dhe Kili.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.