Provimi i Bankave të Mëdha – Fed do ta bëjë më transparente provën e rezistencës, jep informacione
Rezerva Federale do t’i bëjë provat e rezistencës ndaj bankave të mëdha më transparente, duke i ofruar firmave financiare më shumë informacion mbi mënyrën se si do të performojnë portofolet e tyre ndaj goditjeve ekonomike.
Në stres-testin e 2019-ës, bankat e mëdha do të kenë më shumë informacion mbi modelet që banka qendrore përdor për të testuar bilancet e tyre, përfshirë performancën e supozuar të kredive. Prova e 2019-ës do të përfshijë faktorizimin e një rritjeje me 10% të papunësisë, si dhe shtimin e stresit në kreditë e korporatave dhe tregjet e pronave të paluajtshme tregtare.
Ndryshimi në transparencë, i propozuar fillimisht nga Rezerva Federale në vitin 2017, synon të trajtojë ankesat e bankave se prova aktuale e stresit është e rëndë dhe jo transparente. Bankat më pak komplekse me aktive mes 100 miliardë – 250 miliardë dollarë, nuk do të jenë pjesë e provës së 2019-ës. Hapat e Fed për të bërë transparente testimet pritet të trajtojnë disa nga shqetësimet e bankave, megjithatë, një pjesë e Wall Street ka paralajmëruar se transparenca e lartë mund të lejojë bankat që të maskojnë rreziqet, duke mashtruar në provim.
Testi vjetor i stabilitetit të bankave provon bilancet e bankave të mëdha si JPMorgan dhe Citi ndaj goditjeve të supozuara ekonomike, për të siguruar se këto mund të përballojnë një krizë të ardhshme. Prova e rezistencës përbën një event vjetor të rëndësishëm për bankat, pasi nuk mund të shpërndajnë kapitalin nëpërmjet dividentët, riblejnë aksione apo ndërmarrin investime të tjera, pa kaluar provimin e Rezervës Federale. 34 banka kaluan provimin vitin e kaluar, ndërsa Goldman Sachs dhe Morgan Stanley kaluan me kusht, duke limituar dividentët.
Filiali i Detutsche Bank në SHBA, pësoi refuzim të planit për kapital nga Rezerva Federale.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.