PSA cakton drejtuesit e Opel – Corsa në të njëjtën linjë me Peugeot 208 dhe Citroën C3
Peugeot – Citroën ka caktuar menaxherë të rinj për Opel dhe Vauxhal, duke përfunduar blerjen prej 2.2 miliardë euro, gjë që e ktheu kompaninë franceze në prodhuesin e dytë më të madh në Europë. Kompania amerikane, General Motors, i shiti operacionet europiane te prodhuesi i Peugeot e Citroën, që ka një historik më të mirë të përfitueshmërisë në rajon.
Firma franceze mund të ndërtojë tashmë Opel Corsa nën të njëjtën bazë që prodhon modelet Peugeot 208 dhe Citroën C3. “Po përjetojmë krijimin e një kampioni të vërtetë europian. Ne do të kthejmë Opel dhe Vauxhall në përfitueshmëri”, tha kreu ekzekutiv i kompanisë, Carlos Tavares. Opel lajmëroi ekipin e ri të lidershipit, duke u vendosur ekzekutivë të Peugeot – Citroën në postet kryesore.
Objektivi për Opel është gjenerimi i një fluksi operacional pozitiv të parasë si dhe një marzh i operimit prej 2% , deri në vitin 2020. Javën e kaluar, ish zotëruesi i Opel, General Motors, raportoi një humbje prej rreth 800 milionë dollarë në Europë për tremujorin e dytë. Për kompaninë amerikane, marrëveshja shënon një tërheqje nga Europa, rajon ku nuk ka gjeneruar fitim që prej vitit 1999.
Me ndërrimin e ekzekutivit në vitin 2014, General Motors është fokusuar më shumë te përfitueshmëria, duke u larguar nga tregje si Rusia e Indonezia, si dhe duke tërhequr markën Chevrolet nga Europa.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.