Pse BREXIT u shty deri me 31 tetor 2019 dhe kush ishte personi që luajti rolin kryesor në këtë vendim!

Dalja e Britanisë nga Bashkimi Europian do të shtyhet deri në fund të muajit tetor të këtij viti, nën një plan që synon të shmangë një ndarje pa marrëveshje që mund të krijojë kaos, që mund të rrezikojë 6 muaj të tjerë paqartësish politike në marrëdhënien mes Britanisë dhe Bashkimit Euriopian.

“Bloomberg” shkruan se kryeministrja britanike Theresa May e ka pranuar ofertën dhe tashmë duhet t’ua “shesë” anëtarëve skeptikë të parlamentit në Londër.

Në fakt, kryeministrja britanike kishte kërkuar një afat më të shkurtër, deri në fund të qershorit  ndërsa Brukseli zyrtar kërkoi një shtyrje deri në fund të vitit.

Rolin kryesor në përcaktimin e afatit të ri duket se e ka luajtur presidenti francez Emmanuel Macron që ka mbajtur një linjë të ashpër dhe një rol drejtues në diskutime për afatin e ri. Macron ka mbështetur fort tezën për një shkurtim të afatit nga ana e Bashkimit Europian dhe vendosjen e kushteve më të forta që sigurojnë se Britania nuk do të mudn të sabotojë ekonominë e Bashkimit Europian në rrugën e daljes.

Mediat parashikojnë se më këtë shtyrje, Britanisë mund t’i duhet që të marrë pjesë në zgjedhjet europiane të muajit të ardhshëm.

Në fakt, kjo është ajo që kryeministrja dhe shumë kolegë të saj e kanë cilësuar si të papranueshme gjatë gjtihë kohës që prej votimit për daljen nga Bashkimi Europian.

Vetë kryeministrja është në presion nga ata që mbështesin BREXIT në partinë e saj, që kërkojnë dorëheqjen në mënyrë që t’i hapet rruga një liderit të ri. Ajo ka premtuar se do të dorëhiqet pasi të jetë mbyllur procesi i divorcit, në mënyrë që kryeministri i ri i vendit që do ta pasojë, të drejtojë negociatat për fazën e dytë; atë që lidhet me të ardhmen e marrëdhënieve tregtare me Bashkimin Europian.

Një shtyrje 6 mujore mund t’u japë kritikëve në parti, kohën e nevojshme që u duhet për të zhvilluar një garë për lidership, për zëvëndësimin e saj.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.