Pse falimentoi firma më e vjetër e udhëtimeve në botë?
Pas 178 vitesh në treg, Thomas Cook, firma më e vjetër e udhëtimeve, falimentoi. Rreth 600 mijë persona mbetën ‘mes katër rrugëve’. Njoftimi i CEO-s së kompanisë, Peter Fankhauser erdhi pasi bordi dështoi të siguronte një marrëveshje me qeverinë, për t’a shpëtuar nga borxhi 1.6 miliardë paund.
Por, kur u kthye gjithçka përmbys? Sipas Simon Calder, redaktorit të prestigjiozes The Indipendent, telashet e Thomas Cook erdhën pasi kompania po i qëndronte besnike ‘të vjetrës’; refuzoi të transformohej e të ecte me hapat e kohës.
“Thomas Cook solli revolucionin e udhëtimeve, bëri gjëra të mrekullueshme, industrializuan udhëtimet, shpikën paketat e udhëtimeve” tha Calder për Euronews. “Por në fund të shekullit XX, e veçanërisht në fillim të shekullit XXI, kompania e shpërqendroi vëmendjen. Nuk arritën të kuptonin se njerëzit, sidomos të rinjtë, nuk po përdorin më agjencitë e udhëtimeve, në të cilat duhet të paraqiten fizikisht” shtoi Simon Calder.
Redaktori i The Indipendent theksoi faktin se firma më e vjetër e udhëtimeve nuk i kushtoi rëndësi linjave të mëdha ajrore ‘low-cost’, si EasyJet apo Ryanair.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.