Pse FMN kërkon rritje taksash? Shqipëria, nivelin më të ulët të të ardhurave të qeverisë në raport me PBB
Në raportin e parë të post-monitorimit, Fondi Monetar Ndërkombëtar i rekomandoi qeverisë shqiptare të aplikojë një sërë taksash të reja, të cilat përkthehen në një kosto vjetore shtesë prej 86 milionë eurosh për shqiptarët.
Taksat e reja përfshijë atë të biznesit të vogël, atë të tatimit mbi të gjitha nivelet e pagave, përfshirë atë minimale, indeksimin e taksave kombëtare në bazë të normës së inflacionit, etj.
Ky rekomandim merr shtysë jo vetëm nga ngadalësimi i hapit të konsolidimit fiskal por edhe nga fakti se, Shqipëria është vendi që ka peshën më të ulët të të ardhurave dhe shpenzimeve primare të qeverisë në raport me Prodhimin e Brendshëm Bruto në rajon. Ky grafik e ilustron më së miri diçka të tillë dhe tregon se të ardhurat e qeverisë dhe shpenzimet primare në raport me Prodhimin e Brendshëm Bruto gjatë periudhës 2008-2016 fiksohen në 26%, pra rreth 1 e katërta, ndërkohë që në vendet e tjera të Europës qendrore dhe juglindore kjo normë ngjitet përtej 30% e në rreth 40% për pjesën dërrmuese.
Kjo do të thotë se, niveli i mbledhjes së të ardhurave nuk është aspak i kënaqshëm. Kjo ka qenë një problematikë e kahershme e qeverive shqiptare ndër vite, dhe vazhdimisht janë bërë përpjekje që të ardhurat të rriten duke përmirësuar mbledhjen e tyre, dhe jo duke i rritur. Por, tashmë duket se po shterojnë edhe këto hapësira.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.