Pse “KE” uli projeksionet? – Pesimizmi buron nga kriza politike dhe TVSH në turizëm
Pasi rriti dy herë projeksionet në mënyrë të paprecedentë brenda 30 ditëve, njëherë gjatë Majit e një herë gjatë Qershorit, Komisioni Europian ka ulur me një shkallë projeksionet për rritjen ekonomike të Shqipërisë gjatë këtyre dy viteve.
Ndërkohë që në raportin e fillim Qershorit projektohej një rritje e ekonomisë me 3.8% për vitin aktual, në raportin e fundit, atë për vendet kandidate, Komisioni Europian vlerëson se, ekonomia shqiptare do të ritet me 3.7% gjatë këtij viti.
Projeksionet e Qershorit ishin aq optimiste sa tejkalonin edhe ato të qeverisë shqiptare. Për vitin e ardhshëm ndërkohë, projeksionet janë ulur në 3.9%, nga 4.1% që projektohej rreth një muaj më parë.
Raporti i fillimvitit ndërkohë fliste për një rritje ekonomike pranë 3.5% dhe 3.6% për të dy vitet.
Arsyeja e shkurtimit të projeksioneve gjendet mes rreshtave në raport, dhe arsyet kryesore duket se janë dy.
Së pari, Komisioni Europian flet për një ngadalësim të ekonomisë gjatë tremujorit të dytë, duke e lidhur këtë ngadalësim me gjasat që të ketë ndikuar kriza politike.
Së dyti, Komisioni Europian evidenton edhe uljen e TVSH në turizëm, në 6% nga 20% që ishte më parë.
Në këtë pikë, krahu ekzekutiv i Bashkimit Europian i referohet të dhënave të Ministrisë së Financave, sipas të cilave humbja në të ardhura nga aplikimi i kësaj mase nuk do t`i tejkalojë 0.1% të Prodhimit të Brendshëm Bruto.
Po kaq është edhe shkurtimi më i fundit i projeksioneve që Komisioni Europian i ka bërë ekonomisë shqiptare për këtë vit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.