Pse u përhap koronavirusi në Itali? – “Fat i keq dhe mosrespektimi i protokolleve të sigurisë”
Pas rritjes së koronavirusit në Itali, që është kthyer në vendin më të goditur në Europë, qëndron një kombinim i fatit të keq dhe mungesës së protokolleve të sigurisë. Autoritetet e shëndetësisë thonë se kërkimi tejet i përpiktë i vendit për raste të reja e ka fryrë situatën. Qeveria e Kryeministrit Giuseppe Conte po përpiqet të luftojë epideminë, ndërkohë që numri i të infektuarve ka kaluar 280 dhe 7 pacientë kanë vdekur.
Pjesë të mëdha të rajoneve të Lombardisë dhe Venetos në Veri të Italisë, që zgjaten nga Milano në Venecia, ndodhen në karantinë. Përhapja e shpejtë e virusit atje bën kontrast me vende të tjera në Europë, përfshirë në një furnitor të pjesëve të makinave në Gjeramin dhe në një resort të skive në Francë, ku autoritetet identifikuan menjëherë bartësin dhe ndaluan përhapjen. Përhapja në Itali e ka zanafillën tek një 38-vjeçar që kërkoi trajtim në një spital në Kodono afër Milanos më 18 Shkurt.
Ai nuk ka qenë në Kinë së fundmi dhe mënyra se si u infektua qëndron një mister. Virologët në universitetin e Milanos thonë se origjina e virusit është thjesht fat i keq, pasi shanset që dikush në një vend periferik të rezultonte me koronavirus ishin tejet të ulëta. Më parë, Italia regjistroi vetëm 3 raste në Romë, përfshirë një çift kinez që po vizitonin qytetin. Kryeministri Conte e fajësoi përhapjen e shpejtë tek një spital që nuk e përmendi emrin, duke thënë se nga atje, sëmundja është përhapur si pasojë e mosrespektimit të protokolleve të sigurisë. Ai shtoi se qeveria mund të limitojë fuqinë e autoriteteve lokale të shëndetësisë nëse dështojnë të koordinohen. Pas përhapjes, qeveria shtoi masat e përmbajtjes së virusit dhe testimit, duke vendosur në karantinë një zonë me mbi 50,000 persona.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.