Pse u shty deklarimi i të ardhurave për individët? Relacioni: Pandemia dhe rreth 69 mijë persona që do ta plotësojnë për herë të parë

Përmes një Akti Normativ, Këshilli i Ministrave ka shtyrë me dy muaj afatin e dorëzimit të deklaratës së të ardhurave personale për personat që fitojnë më shumë se dy milionë lekë në vit, si dhe ata që përfitojnë dy paga. Ndërsa afati ligjor ishte 30 prilli, Qeveria ka vendosur të shtyjë deri në fund të qershorit hapësirën për dorëzimin e deklaratave pranë administratës tatimore.

Ky akt normativ ësnhtë depozituar në Kuvend,sëbashku me relacionin ku jepen arsyet që çuan në marrjen e këtij vendimi.

Referuar relacionit, situata me të cilën vazhdon të përballet vendi ynë si rezultat i pandemisë të shkaktuar nga COVID-19 ka bërë të nevojshëm krijimin e një kuadri rregullator, i cili ndihmon tatimpaguesit në shtyrjen e detyrimeve të tyre tatimore, duke qenë se shumë individë, si shkak i periudhës së izolimit dhe shpenzimeve të shkaktuara nga kjo pandemi janë ndeshur me vështirësi financiare.

“Njëkohësisht, duke filluar nga viti 2020, shtohet gama e individëve të detyruar për plotësimin e deklaratës individuale të të ardhurave (në vijim, DIVA), pasi tashmë do të përfshihen edhe ata individë, të cilët janë të punësuar në më shumë se një punëdhënës. Duke qenë se kjo kategori e re tatimpaguesish e përfshirë në deklarimin e DIVA-s janë plotësues për herë të parë të deklaratës dhe shoqëruar me pasojat e shkaktuara nga pandemia, është gjykuar të propozohet shtyrja e afateve të deklarimit dhe pagesës së DIVA-s. Për këtë qëllim, me anë këtij projektakti normativ synohet të shtyhet afati për deklarimin e DIVA-s dhe pagesën e detyrimit që mund të lindë në këtë rast për periudhën tatimore të vitit 2020, si dhe të falen sanksionet administrative që mund të aplikohen, me kusht që dorëzimi i deklaratës dhe pagesa e detyrimit të kryhen deri më 30 qershor 2021” shkruhet në relacion.

Objektivi që synohet të arrihet është mbështetja ekonomike ndaj individëve duke shtyrë afatin e deklaratës e të pagesës që lidhet me DIVA-n, si dhe plotësimi i kuadrit të nevojshëm ligjor, në mbështetje të planit të qeverisë për rehabilitimin e tatimpaguesve të prekur si pasojë e fatkeqësive natyrore dhe konktretisht nga situata e shkaktuar nga pandemia COVID-19.

Çfarë ndryshon?

-Në nenet 13 dhe 13/6, pika 5, të ligjit nr.8438, datë 28.12.1998, “Për tatimin mbi të ardhurat”, të ndryshuar, parashikohet se plotësimi dhe paraqitja e deklaratës vjetore individuale të të ardhurave në administratën tatimore bëhet jo më vonë se data 30 prill e çdo viti për të ardhurat e realizuara në vitin paraardhës. Nëse tatimpaguesi rezulton me pagesë, pagesa e tatimit kryhet jo më vonë se data 30 prill. Për t’i dhënë më tepër kohë tatimpaguesve për plotësimin e kësaj deklarate nevojitet edhe shtyrja për deklarimin e paraqitjen e deklaratës vjetore individuale të të ardhurave, si dhe pagesa për këtë qëllim.

-Numri i tatimpaguesve, të cilët janë të punësuar në më shumë se një punëdhënës dhe duke filluar nga viti 2020 janë të detyruar të plotësojnë DIVA-n është rreth 68 744 individë. Duke qenë se kjo kategori e re tatimpaguesish e përfshirë në deklarimin e DIVA-s janë plotësues për herë të parë të deklaratës dhe shoqëruar kjo me pasojat e shkaktuara nga pandemia, është gjykuar të propozohet shtyrja e afateve të deklarimit dhe e pagesës deri më 30 qershor 2021.

-Gjithashtu, neni 13/9 i ligjit “Për tatimin mbi të ardhurat” parashikon sanksione administrative për mosplotësim në kohë apo plotësimi i pasaktë i DIVA-s, në masën e përcaktuar sipas ligjit të procedurave tatimore. Duke qenë se me anë të këtij akti normativ kërkohet shtyrja e afateve të DIVA-s dhe nëse miratimi I këtij akti normativ ndodh pas datës së fundit të afatit që është në fuqi, pra, miratohet pas datës 30 prill, ndodh që sistemi informatik i administrates tatimore, në mënyrë automatike, të llogarisë gjobat për të gjithë tatimpaguesit, të cilët nuk kanë plotësuar deklaratat deri më 30 prill. Për këtë arsye, parashikohet falja e këtyre detyrimeve, me kusht që dorëzimi i deklaratës dhe pagesa e detyrimit të kryhen deri në datën 30 qershor 2021.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.