Pulla e barnave sërish në Kuvend, LSI kërkon tërheqjen e nismës
Kreu i grupit parlamentar të Lëvizjes Socialiste për Integrim Petrit Vasili bën me dije se në programin e punimeve në Kuvend është futur përsëri miratimi i koncesionit të pullës së barnave. Sipas Vasilit kjo pullë nga 6 lekë të vjetra që është aktualisht do të kushtojë rreth 5 mijë herë më shumë. Ndaj, Vasili ka kërkuar në emër të LSI-së tërheqjen e nismës.
“Me koncesionin, që do të miratojë qeveria, pulla do të kushtojë nga dhjetra deri mijëra herë më shtrenjtë. Thënë më thjeshtë: nga 6 lekë të vjetra mund të arrijë edhe deri në 31 mijë lekë të vjetra, pra rritje rreth 5 mijë herë. Kjo, pasi pulla e barnave tash e tutje do kushtojë sa 2.4% të çmimit të shitjes me pakicë. Grabitje kjo që nuk është parë gjëkund. Kjo është taksa direkte më abuzive mbi shëndetin, që do paguajnë qytetarët. Shëndetësi falas nuk pati jo e jo, por për më zi akoma, po shtojnë dhe taksa të rënda si kjo e pullës, që i bën shqiptarët të paguajnë akoma më shumë për barnat. Kryeministri nga ligji i dekoratave edhe tërhiqet, por kur vjen puna te ligjet, që u hanë lekët dhe i varfërojnë qytetarët dhe pasurojnë të tjerët me koncesione, ai nuk tërhiqet kurrë. Tërhiqu kryeministër, kurseja vetes të paktën këtë gjynah, që lidhet me shëndetin”, shkruan në “Facebook” Vasili.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.