“Puna e bërë për fëmijët, e pamjaftueshme” – BE dhe UNICEF, “shuplakë” qeverisë: Të jenë prioritet në ndërhyrjet ndaj COVID-19

Në Ditën Botërore të Fëmijëve, agjencitë dhe organizatat ndërkombëtare, Bashkimi Evropian, UNICEF, Save the Children, World Vision dhe Terre des Homes e konsiderojnë të pamjaftueshme punën e e bërë deri më tani nga qeveria shqiptare për fëmijët. Përmes një deklarate për mediat këto organizata thonë se sfidat e shërbimeve në kujdesin shëndetësor, arsim, shërbimet sociale dhe ato për mbrojtjen e fëmijëve për shkak të COVID-19, kanë qenë dërrmuese për fëmijët dhe të rinjtë.

Ndërsa paralajmërojnë se impakti i pandemisë do të ndihet në jetët e tyre edhe për shumë vite në të ardhmen, edhe nëse vaksina gjendet së shpejti. “Ndaj, mënyra se si qeveria shqiptare i përgjigjet sot rreziqeve të panumërta që paraqet pandemia për fëmijët dhe adoleshentët, do të përcaktojë të ardhmen e tyre”,-vlerësojnë organizatat ndërkombëtare.

Gjithashtu, sipas tyre “me krizën që vazhdon të thellohet, është thelbësore që më shumë kohë, burime njerëzore dhe përpjekje të investohen, për të kuptuar më mirë ndikimin e plotë të krizës dhe në formulimin e praktikave të provuara dhe premtuese, për të përmbushur të drejtat dhe nevojat e tyre”. Agjencitë dhe organizatat ndërkombëtare kërkojnë që veprimi për fëmijët të jetë i menjëhershëm, duke i bërë vajzat dhe djemtë, veçanërisht ata më vulnerable, prioritet në ndërhyrjet kombëtare ndaj COVID-19.

“Ne kemi nevojë për mënyra të reja angazhimi, për të vënë fëmijët në qendër të agjendës politike, me fokus të veçantë tek më të prekurit dhe më të pa-favorizuarit”,-thuhet ndër të tjera në deklaratë. Pandemia e shkaktuar nga COVID-19 ka sjellë një sërë pasojash negative te fëmijët, ndërkohë që sipas Anketës mbi Ndikimin Socio-Ekonomi të COVID-19, 104 shtete në të gjithë botën, përfshirë dhe Shqipërinë raportuan ndërprerjen e shërbimeve të lidhura më dhunën ndaj fëmijëve gjatë periudhës së karantinës.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.