Puna e Denjë – CLRSD: Lobim pranë qeverisë për firmosjen e Paktit Global
Shqipëria konsiderohet se është në fazat e para të zhvillimit përsa i takon axhendës së punës së denjë. Raporti i Progresit i Bashkimit Evropian për vitin 2015 thekson qartësisht se qeveria duhet të bëjë më shumë për të promovuar punësimin, shëndetin në punë, çështjet e sigurisë dhe të drejtat e punëmarrësve.
Sipas një raporti të bërë nga Qendra për Marrëdhënie Pune dhe Dialog Social “CLRSD” rezulton se programet e partive politike, kryesisht ato që tashmë janë në Parlament e kanë të përfshirë punën e denjë, por jo të gjithë komponentët e saj.
Sipas raportit, i cili iu prezantua grupeve të interesit, ato kanë tendencën të adresojnë vetëm dy prej katër komponentëve përbërës të punës së denjë: punësimin dhe mbrojtjen sociale. Dialogu social dhe të drejtat e punëmarrësve nuk gjenden në këto dokumente programore politike të forcave kryesore.
“Është një situatë që është në përmirësim e sipër, ka problematikat e veta. Çështja e punës së denjë është në fillesat e saj, për këtë arsye sot organizata të ndryshme, sindikatat, organizatat e shoqërisë civile, apo grupime të tjera të interesuara në çështjet e të drejtave të punëtorëve, janë mbledhur për të promovuar këtë ditë.
Nga monitorimi rezultoi se në fakt konceptet, puna e denjë, elementë të veçantë të saj janë të përfshirë në programet e partive politike. Përmendim këtu çështjet e punësimit, apo çështjes e mbrojtjes shoqërore që janë dy elementë shumë të rëndësishëm të punës së denjë. Por ndërkohë dy komponentë të tjerë që janë po aq të rëndësishëm, që kanë të bëjnë me të drejtat e punëtorëve dhe me dialogun social pothuajse nuk gjejnë përfshirje qoftë në programet e partive politike të ndryshme, apo në diskursin e tyre publik”, u shpreh Edison Hoxha, ekspert ligjor pranë CLRSD.
Si një prej elementëve kyç të garantimit të zhvillimit të qëndrueshëm ekonomik dhe reduktimit të varfërisë, puna e denjë përbëhet nga komponentët e punësimit, mbrojtjes sociale, të drejtave të punëmarrësve dhe dialogut social. Kjo qendër iu bën thirrje partitë politike që të përfshijnë edhe më shumë punën e denjë në programet e tyre politike.Gjithashtu, CLRSD angazhohet që të lobojë pranë qeverisë që brenda vitit të parë të saj, të bëhet e mundur firmosja e Paktit Global për Punën e Denjë.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.