Punë, por jo para – Britani, papunësia më e ulët që prej 1975, pagat bien

Për herë të parë në dy vite e gjysmë britanikët janë përballur me një rënie të pagës reale, pavarësisht se, papunësia ka rënë pranë nivelit minimal.

Paga reale, e rregulluar sipas normës së inflacionit, ka rënë me 0.2%, tregon zyra e statistikave në vend.

Të ardhurat nominale ngadalësuan rritjen në vetëm 2.1%, pranë nivelit më të ulët të 8 muajve të fundit. Norma e papunësisë pranë 4.6% ndërkohë flet për nivelin më të ulët që prej vitit 1975.

Të dhënat tregojnë se, debati kryesor gjatë fushatës elektorale për zgjedhjet e përgjithshme të 8 qershorit do të jetë pikërisht ky, standardet e jetesës së britanikëve.

Një ditë më parë, të dhënat tregonin se inflacioni po i drejtohet normës së 3%, duke shtrydhur shpenzimet konsumatore, që janë edhe motori i ekonomisë britanike. Vetëm gjatë Marsit, shpenzimet ranë me 0.5%, që është edhe rënia më e madhe që prej korrikut të vitit 2014.

Pjesa dërrmuese e indikatorëve sinjalizojnë kohë aspak të mira për ekonominë britanike, sidomos tani që vendi po përgatitet që të shkëputet plotësisht nga Bashkimi Europian.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.