Punësimi në Britani – Bie për të dytin muaj radhazi, rritja e pagave përshpejtohet
Numri i personave të punësuar në Britani ka rënë përsëri, duke treguar qasjen më të kujdesshme të punëdhënësve ndërkohë që Brexit po afron. Të dhëna të tjera nga Zyra e Statistikave treguan se rritja e pagave është përshpejtuar, megjithatë jo me të njëjtin ritëm sa niveli i çmimeve.
Ndryshe nga vendet e tjera të Europës, ekonomia e Britanisë është ngadalësuar ndjeshëm këtë vit, ndërkohë që dalja nga Bashkimi Europian ka ndikuar te ekonomitë familjare dhe kompanitë.
Megjithatë, krijimi i vendeve të punës ka qenë i fortë deri në kohët e fundit. Numri i personave të punësuar ra me 56 mijë në periudhën Gusht-Tetor, që është rënia më e madhe që prej mesit të 2015-ës. Kjo ishte rënia e dytë radhazi, nxitur kryesisht nga punonjësit e rinj.
Të ardhurat mesatare javore, përjashtuar bonuset, u rritën me një normë vjetore prej 2.3% gjatë periudhës, krahasuar me 2.2% në Korrik-Shtator. Duke përfshirë bonuset, rritja e pagave u përshpejtua në 2.5% nga 2.3% që ishin projeksionet.
Megjithatë, rritja e pagave ka mbetur pas rritjes së inflacionit, që shënoi nivelin më të latë në 6 vite në 3.1% për Nëntorin. Sipas ekonomistëve të Commerzbank, rritja e pagave do të vazhdojë të përshpejtohet ,megjithatë, shifrat e dobëta të punësimit tregojnë për rreziqe.
Norma e papunësisë qëndroi në nivelin më të ulët në 4 dekada në 4.3%, ndërsa projeksionet qëndronin për një rënie të mëtejshme në 4.2%.
Banka e Anglisë rriti normën bazë të interesit për të parën herë që prej vitit 2007 gjatë muajit të kaluar, ndërkohë që shumica e politikëbërësve argumentuan se rënia e madhe e papunësisë do të nxisë rritjen e pagave.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.