Punësimi në kapacitet të plotë në Britani-Rritje anemike pagash
Papunësia në Mbretërinë e Bashkuar vijon të bjerë, ndërkohë që norma e papunësisë mbetet e pandryshuar në 4.8%, që është edhe niveli më i ulët në më shumë se një dekadë. Numri i të papunëve ra me 7.000 persona gjatë tremujorit të fundit të 2016-ës, duke zbritur në 1.6 milionë persona.
Punësimi ndërkohë u rrit me 37 mijë individë, në 31.8 milionë, ndërkohë që norma e punësimit u rrit pranë rekordit të 74.6%, tregon zyra e statistikave në vend. Pavarësisht rritjes së punësimit, pagat vijojnë të ngadalësohen, dhe ky është një ndër problemet më të mëdha me të cilat përballet Mbretëria sot, në terma makro-ekonomikë.
Gjatë tremujorit të fundit, rritja e pagave u ngadalësua me 2.6%. Paundi britanik humbi terren kundrejt dollarit amerikan pas publikimit të këtyre të dhënave. Mosrritja e pagave e kombinuar me rritjen e inflacionit, që preku 1.8% gjatë Janarit, me shumë gjasa do të manifestohet me një rënie të konsumit, duke ngadalësuar edhe ekonominë e ishullit, në një kohë që vendi po bëhet gati për të dalë formalisht nga Bashkimi Europian. Gjithsesi, tregu i punës mbetet ngushëllimi i vetëm për ekonominë britanike, të paktën në shifra. Aktualisht, tregu i punës është pranë kapacitetit të plotë.
Roel Korkuti/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.