Punësimi sipas qarqeve për muajin mars – Tirana kryeson listën, Dibra me numrin më të ulët

1396 persona janë punësuar gjatë muajit mars. Shifrat e Zyrave të Shërbimit Kombëtar të Punës janë bërë publike ditën e djeshme nga kryeministri, Edi Rama, të cilin e ka konsideruar këtë një rezultat shumë inkurajues.

Ndërkohë, përmes një postimi në profilin e tij në ‘Facebook’, ka publikuar edhe të dhënat e ZSHKP-ve për punësimin gjatë muajit mars sipas qarqeve.

Kështu, nga të dhënat rezulton se qarku më me shumë të punësuar është ai Tiranës me 252, ndjekur nga qarku i Durrësit me 221 të punësuar dhe ai i Fierit me 212.

Ndërkohë, në qarkun e Shkodrës numërohen 166 të punësuar, 89 në atë të Korçës, ndjekur nga qarku i Beratit dhe Elbasanit me 87 të punësuar për secilin prej tyre.

Sa i takon qarkut të Vlorës, referuar të dhënave të Zyrave të Shërbimit Kombëtar të Punës, janë punësuar 77 persona. Gjatë kësaj periudhe në qarkun e Lezhës  numërohen 70 të punësuar, ndjekur nga qarku i Gjirokastrës me 65, dhe ai i Kukësit me 47 të punësuar.

Sipas të dhënave në qarkun e Dibrës janë punësuar vetëm 23 persona, duke e bërë atë qarkun me numrin më të ulët të të punësuarve gjatë këtij muaji.

Ndërkohë, kryeministri Edi Rama është shprehur se deri në fund të vitit kjo shifër do të arrijë në 25 mijë të punësuar.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.