‘Punëtorët e padukshëm’: Të nënpaguar, të shfrytëzuar dhe të rrezikuar nëpër fermat e Europës

Ndërsa pandemia e koronavirusit përfshiu të gjithë Europën dhe jo vetëm, ata që ndihmuan për të sjellë ushqim në pjatat tona befas u bënë të dukshëm, madje u përshëndetën si “punëtorë thelbësorë”. Por për gjashtë dekadat e fundit, politika e bujqësisë e Bashkimit Europian ka anashkaluar të drejtat e tyre të punës dhe kushtet e jetesës.

Politika e zakonshme bujqësore e BE – e cila përbën mbi një të tretën e buxhetit të bllokut – synon të mbështesë pronarët e fermave dhe pompon gati 60 miliardë euro në sektor çdo vit. Kushtet e punës së atyre që janë punësuar nga këto ferma, megjithatë, as nuk janë përmendur në skemën e subvencioneve.

“Për momentin kemi këtë situatë të çmendur ku ne në të vërtetë kemi mbrojtje më të mirë për kafshët sesa për disa nga këta punëtorë në fermat tona,” tha deputeti gjelbër gjerman Daniel Freund.

Në një hetim të përbashkët me Lighthouse Reports, Der Spiegel dhe Mediapart, Euronews intervistoi dhjetëra punëtorë të fermave në të gjithë kontinentin, shumica e tyre emigrantë ndërkufitar.

Ata u ankuan për orë të papaguara, duke punuar nën një presion të jashtëzakonshëm, me shumë pak ujë ose mbrojtje, me shqetësime dhe sëmundje nga rraskapitja. Ata na treguan kushte të rënda strehimi dhe folën për raste abuzimi verbal, fizik dhe madje edhe seksual.

“Ne dëgjojmë që emigrantët vijnë sepse është e vështirë të rekrutohen, sepse ka një mungesë të krahut të punës”, thotë Catherine Laurent, nga Instituti Kombëtar Francez i Kërkimeve Bujqësore (INRA).

“Vlen të pyesim veten: a është e vështirë të rekrutosh sepse ekziston mungesa e punës, ose për shkak se kushtet me të cilat duhet të përballen këta punëtorë janë të tilla që është praktikisht e pamundur që vendasit t’i pranojnë ato?”.

Më 19 qershor, Parlamenti Europian pranoi sfidat me të cilat përballen punëtorët sezonalë dhe ndërkufitar kur ajo miratoi një rezolutë që kërkonte veprime urgjente për të mbrojtur shëndetin dhe sigurinë e tyre. Ai deklaroi se pandemia kishte “ekspozuar dhe përkeqësuar kushtet dhe situatën ekzistuese” për shumë prej tyre.

Eurodeputetët i bënë thirrje Komisionit që të trajtojë praktikat abuzive të nënkontraktimit dhe të sigurojë që Autoriteti Europian i Punës (ELA) të bëhet plotësisht funksional si çështje prioritare. Ata gjithashtu u kërkuan shteteve anëtare të forcojnë inspektimet e punës dhe të sigurojnë strehim cilësor të shkëputur nga paga e punëtorëve.

Komisioni Europian tani ka zbuluar udhëzime për vendet anëtare për të mbrojtur më mirë shëndetin dhe të drejtat sociale të punëtorëve sezonalë.

“Ju nuk mund të keni një model biznesi i cili bazohet në një formë të shfrytëzimit të punëtorëve të huaj”, tha Nicolas Schmit, Komisioneri Europian për Punë dhe të Drejta Sociale për EN. “Këta punëtorë janë punëtorë thelbësorë sepse në këtë krizë, nëse nuk do t’i kishim ata, do të kishim një krizë ushqimore.” (EN)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.