Pushime falas për fëmijët me aftësi të kufizuara – Ideja e kroatëve që bashkoi Ballkanin
Një grup pronarësh shtëpish dhe apartamentesh në detin Adriatik në Kroaci ka vendosur të gëzojë fëmijët me aftësi të kufizuara duke u lejuar atyre të kalonin disa ditë pushime falas në plazh. Ata themeluan një grup në Facebook të quajtur “Qiradhënësit me zemër”, përmes të cilit disa familje përfituan pushime falas.
Ideja lindi në Postira në Ishullin Brač e më pas u përhap në rrjetet sociale, me gjithmonë e më shumë pritës që u hapnin dyert fëmijëve në nevojë dhe prindërve të tyre.
Lajmi bëri bujë deri në Serbi, Bosnje Hercegovinë, Mal të Zi dhe Maqedoni, me shumë prindër që pyesnin nëse mund të përfitonin nga oferta bujare.
Media serbe e përkrahën këtë nismë dhe lajmet hapeshin me titullin “Bravo! Njerëz në masë ofrojnë akomodim falas në Adriatik për fëmijët me aftësi të kufizuara” “Ballkani u bashkua, dhe do të gëzoheni më shumë kur të dini arsyen pse”.
Një nga administratorët e grupit në Facebook iu përgjigj kështu pyetjes së një prindi nga Serbia nëse mund të vinin edhe ata në Kroaci:
“Përse të mos mund të vini? Sëmundja, dhimbja, fëmijët nuk njohin kufij. Ejani këtë verë që të bëhemi një planet”.
Programe të tilla, sidomos të fokusuara tek fëmijët, nuk janë të rralla as në Ballkan. Vitin e kaluar, Maqedonia nisi një program, ku rreth dy mijë fëmijë nga familje në vështirësi ekonomike mundën të shkonin në pushime falas.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.