Putin mbron Snowden – Ishte e gabuar të nxirrte sekretet, por nuk është tradhtar
Presidenti rus Vladimir Putin është shprehur se ish-kontraktori i NSA, Edward Snowden bëri gabim që nxorri sekretet e spiunazhit amerikan, por nuk është tradhtar.
Putin, i cili është një ish-oficer i KGB dhe ish-kreu i agjencisë ruse të sigurimit FSB, i bëri komentet gjatë një interviste me regjisorin amerikan Oliver Stone, e cila do të transmetohet më 12 Qershor.
‘Snowden nuk është tradhtar. Ai nuk i tradhtoi interesat e vendit të tij e as nuk e transferoi informacionin në ndonjë vend tjetër që do të dëmtonte popullin e tij”, tha Putin.
Lideri i Rusisë u shpreh se nëse nuk i pëlqente se çfarë po bënte Snowden duhet të kishte lënë punë, ashtu siç u dorëhoq Putin nga KGB, në vend të nxirrte sekretet. Sipas Putin, kjo ishte një gjë e gabuar.
Megjithatë, Snowden kishte të drejtën të vepronte në mënyrën që zgjodhi, tha Putin, duke pranuar se survejimi amerikan ishte bërë shumë cënues, ndërsa vetë vlerësoi shërbimet e inteligjencës në Rusi, të cilat zbatojnë ligjin.
Ai kritikoi SHBA sepse kishin përgjuar edhe vetë aleatët e tyre si Gjermania.
“Të përpiqesh të spiunosh aleatët e tu, nëse i konsideron vërtet aleatë dhe jo vasalë, është e pahijshme. Kjo cënon besimin dhe në fund dëmton vetë sigurinë e vendit tënd”.
Snowden, 33 vjeçar, ka marrë azil në Rusi në vitin 2013 dhe avokati i tij shprehet se ka të drejtën të qëndrojë në Rusi deri në vitin 2020 dhe të aplikojë për shtetësi vitin e ardhshëm. Snowden ka përdorur rrjetet sociale për të kritikuar edhe autoritetet ruse, të cilat detyrojnë me ligj kompanitë e komunikimit të ruajë telefonatat dhe aktivitetin e internetit për 6 muaj.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.