Qëndrimi i LSI në Kuvend, Vasili: Tolerancë zero ndaj hajdutërisë
Lëvizja Socialiste për Integrim do ta shndërrojë parlamentin në një barrikadë të pakapërcyeshme. Ky ka qenë vendimi i marrë në mbledhjen e grupit parlamentar, pak para nisjes së sesionit të ri të punimeve të Kuvendit.
Kreu i grupit Petrit Vasili është shprehur në një dalje për mediat, se LSI do të bllokojë me çdo mjet demokratik aktet që cënojnë zhvillimin e vendit dhe hajdutërinë, duke nisur nga dy ligjet e rikthyera në Kuvend nga Presidenti.
“Përballja do të fillojë që nga rifutja e ligjit për teatrin, pas kthimit nga Presidenti i Republikës, kthim i cili ishte një mundësi e madhe për mazhorancën të bënte një hap pas nga kjo hajdutëri e jashtëzakonshme, bëhet fjalë për 200 e ca milionë euro. Po kështu qëndrim do të mbajmë pas kthimit nga presidenti të ligjit që ka lidhje me bixhozin, me lojërat e fatit”, deklaroi Vasili.
Vasili denoncoi gjithashtu bllokimin që po i bëhet nismës së LSI për të ndryshuar mënyrën e qasjes ndaj koncesioneve dhe rritjen e transparencës për publikun.
“Përsëri është një çështje madhore, problemi i rrënimit ekonomik nga koncesionet. Që në 16 shkurtin e vitit 2016, dy vjet e gjysmë më parë, kjo rilindje që drejton vendin ka bllokuar në mënyrën më të turpshme një nismë e cila ka të bëjë me koncesionet, ku ne i kërkonim transparencë të potë, ardhjen në parlament, miratimin në sallën e parlamentit, që gjithë shqiptarët të dinin se çfarë detyrimesh të merrnin përsipër, ç’ishte e mirë dhe ç’ishte e keqe nga këto koncesione, dhe kjo nismë prej dy vjet e gjysmë bllokohet në parlament”, tha Vasili.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.