Qëndrimi i PS për reformën zgjedhore, Rama: Jemi pro hapjes së listave, por sistemi nuk ndryshon
Partia Socialiste do të pranojë hapjen e listave zgjedhore, si një prej kërkesave të bëra nga opozita parlamentare. Gjatë një bashkëbisedimi me gazetarët, kryeministri Edi Rama tha se vendimi është bazuar më së shumti në dëshirën e votuesve.
“Ne kemi vendosur që të mbështesim si Parti Socialiste një hapje të listave dhe t’i japim mundësi çdo zgjedhësi të zgjedhë subjektin politik dhe të shprehë preferencën e tij për deputetin/en e përfshirë në listën e subjektit. Hapja e listave përkon me dëshirën e një mase shumë të madhe qytetarësh shqiptarë, që shkon shumë përtej një shumice apo pakice qeverisëse.”
Megjithatë, sipas Ramës listat e hapura janë thjesht një mekanizëm korrektues , çka nuk nënkupton ndryshimin e sistemit zgjedhor në vend. “Dua të sqaroj që pse nuk bëhet fjalë për ndryshim sistemi.
“Ne kemi sot një sistem proporcional që nuk preket pavarësisht se nga ana e opozitës parlamentare është kërkuar një sistem proporcional kombëtar, që do të thotë ndryshim sistemi. Gjithashtu ndryshim I zonave zgjedhore konsiderohet ndryshim I sistemit, kjo gjithashtu nuk preket. Së treti, KQZ, ose institucion kryesor i administrimit të zgjedhjeve, kjo preket, por si rezultat i marrëveshjes së 5 qershorit.”
Ndërkaq, sa i takon kërkesës tjetër të opozitës parlamentare, që ka të bëjë me depolitizimin e administratës zgjedhore, Rama tha se ai është dakord me propozimin, por nuk mund ta pranojë, pasi kjo është një prej pikave të dakordësuara në marrëveshjen e 5 qershorit, si një garanci për opozitën jashtëparlamentare mbi cilësinë e zgjedhjeve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.