Qershori “ndëshkon” Europën – Bursat e kontinentit të vjetër, rezultatin më të dobët në 1 vit
Tregjet europiane të aksioneve u regjistruan në nivele të pandryshuara gjatë ditës së fundit të javës.
Pavarësisht kësaj, bursat e kontinentit të vjetër, në mënyrë të pashmangshme janë të destinuara që të mbyllin muajin më të dobët në një vit.
Në këtë performancë kanë pasur ndikim spekulimet mbi shtrëngimin e politikave monetare, gjë për të cilën Banka Qendrore Europiane sqaroi se bëhej fjalë për një keqinterpretim të fjalëve të Mario Draghit.
Indeksi Pan europian Stoxx 600 është në rënie me 2% gjatë muajit Qershor, duke i dhënë kështu fund 4 muajve me radhë në fitim.
Shitja masive e monedhës së përbashkët europiane, rrjedhojë e një spekulimi ende misterioz, si dhe rritja e yieldeve qeveritare të Eurozonës kanë qenë dy prej karakteristikave të tjera gjatë kësaj jave.
Indeksi i naftës dhe gazit ndërkohë ra me 0.6% vetëm gjatë së Premtes. Indeksi që grupon sektorin bankar ndërkohë u rrit gjatë ditës së fundit të javës për të pestin sesion me radhë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.