Qeset plastike, tani me pagesë në çdo dyqan – Ambalazhet do të shënojnë edhe datën e prodhimit
Të gjitha qeset plastike në markete, dyqane dhe supermarkete do të ofrohen vetëm kundrejt pagesës. Këshilli i Ministrave ka nxjerrë një vendim të ri, i cili e bën të detyrueshëm pagesën për qeset plastike mbajtëse, çka deri më tani ishte vetëm opsionale dhe zbatohej nga disa rrjete supermarketesh.
Ky vendim ka hyrë në fuqi ditën e sotme dhe do të nisë të pasqyrohet në kuponat tatimorë të lëshuar nga çdo shitës.
Ndërkohë, pas dy muajsh përcaktohet edhe ndalimi i hedhjes në treg apo përdorimi i qeseve të lehta, që kanë një trashësi më të vogël, me përjashtim të atyre të përdorura për qëllime higjieno-sanitare.
Pas dy muajsh nuk do të lejohen më në treg as qeset plastike të cilat nuk janë të biodegradueshme. Të dyja këto ndalime përcaktoheshin edhe me vendimin e vitit 2012, ndalime që duhet të kishin hyrë në fuqi pas datës 1 shtator 2012.
Vendimi parashikon ndryshime edhe në sistemin e shënjimit dhe identifikimit të ambalazheve, ku prodhuesit tashmë krahas materialeve të ambalazheve duhet të shënojnë edhe inicialet identifikuese të prodhuesit, datën e prodhimit, si dhe shenja identifikuese nëse qeset janë për përdorim në kontakt të drejtpërdrejtë me produktin ushqimor.
Gjithashtu, hallka nëpër të cilën do të kalojnë qeset plastike duhet të regjistrohet nga prodhuesi, importuesi, treguesi apo çdo subjekt tjetër ekonomik për një periudhë 3-vjeçare.
Moszbatimi i këtyre rregullave do të dënohet me gjoba në vlera nga 1 milion deri në 1.5 milionë lekë. Synimi i këtij vendimi është të ulë përdorimin e qeseve plastike, të reduktojë pasojat negative të ambalazheve dhe mbetjeve të tyre, si dhe të nxisë ripërdorimin dhe riciklimin e tyre.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.